Шакиров, Станислав Алексеевич

Станислав Шакиров
Станислав Алексеевич Шакиров
Шочын	1967 ий 23 ӱярня(1967-03-23) (57 ий)
Шочмо вер	РСФСР, Башкир АССР, Пӱрӧ кундем Курмызак ял
Эл	Совет Социализм Республик-влак Ушем  Россий
Тыршымаш алан	музыкант
Чап пӧлек да премий	Марий Элын Калык артистше, Марий Эл Республикын сулло артистше, Пошкырт Элын сулло артистше

Станислав Шакиров (Станислав Алексеевич Шакиров) (1967 ӱярня 23, РСФСР, Башкир АССР, Пӱрӧ кундем Курмызак ял) — марий мурызо, семлызе, Марий Эл Республикын сулло артистше (1997), Марий Эл Республикын Калык артистше (2000), Пошкырт Элын сулло артистше (2012).

Илыш корныжо

Станислав Шакиров 1967 ийын ӱярня тылзын 23-шо кечынже Башкир АССР Пӱрӧ кундем Курмызак ялеш шочын. 1985 ийыште тыштак кыдалаш школым тунем лектын. Кок ий армийыште служитлен. Но чонжо дене мурызак лияш ӱжын. Тыгай шонымаш дене Станислав Йошкар-Олашке толеш. Экзаменым сайын кучен, И.С.Палантай лӱмеш тӱвыра да сымыктыш колледжыш пура. Но тушто шуко ок тунем. Шкенжын вий-куатшым эстрадле муро-влакым мурымаште терга. 1989 ий гыч Марий кугыжаныш филармонийыште пашам ышташ тӱҥалеш.

Тыште тудо "Мари" лӱман эстраде-фольклор тӱшкам пога. Икымше концерт программышт ончышо калыкын кумылжым вигак налын. А вуйлатышын шыма йӱкшӧ да поро гына шинчаончалтышыже угыч да угыч кончер гоч вашлиймашке ӱжыныт. "Какшан сер ӱмбалне ломбо" - тыге маналтын почеламутчо Геннадий Матюковскийын мутшылан возымо семлызе Кузьма Смирновын мурыжо. Тудым марий радион фондышкыжат серен налме. Марий телевиденийысе "Шӱмсем пӧлек" передаче тудын выступленийже деч посна шагал кунам эрта. Станислав Шакировын муро-влакше чӱчкыдын Марий Эл Радион эфирыштыже йоҥгат.

Марий Эл Радиошто йоҥгышо муро-влакше

• Вучо вашмутым
• Ит чамане
• Какшан сер ӱмбалне ломбо
• Кушто тый улат гын
• Лум пеледыш
• Муро маныт
• Мый улам тылат кӧра
• Ой йолташем
• Поч тӧрзатым
• Пу муретым
• Рвезе пагытем
• Туге мо
• Тый дечет посна
• Тылат
• Чолга муро
• Шочмо-кушмо верем
• Шошо пагыт
• Элнет
• Э-э-э ха-ха

Чап

• Марий Эл Республикын сулло артистше (1997).
• Марий Эл Республикын Калык артистше (2000).
• Пошкырт Элын сулло артистше (2012).

Кылвер-влак

• Известный марийский певец Станислав Шакиров получил звание «Заслуженный артист Башкортостана».(руш)

Негыз

1. Писатели Марий Эл: биобиблиографический справочник / сост.: А.Васинкин, В.Абукаев и др. – Йошкар-Ола: Марийское книжное издательство, 2008. – 752 с. С. 399.