Марий Эл Радио
Марий Эл Радио — марла, рушла, суасла йоҥгалтарыше УКВ-радиостанций. Эфир йӱдшӧ-кечыже чарныде кая, йӱдым вияш эфир ок кай, тӱҥ шотышто муро-влак гына йоҥгат. Республикыште тыгай сынан радиостанций икте гына. Кажне кечын, 66-77 МГц частота дипазонышто Марий Эл Республик кумдыкышто радиостанций йоҥгалтара. 2017 ий Шыжа тылзе гыч Марий Эл Радио FM-диапазонышто 105.5 МГц частоташте Йошкар-Олаште йоҥгаш тӱҥалын.
Кызыт «Телерадио Марий Эл» холдингыш пура.
Редакций Йошкар-Олаште Патриарший площадьыште «12 апостол» пӧртыштӧ верланен.
Тӱҥалтыш[тӧрлаташ | кодым тӧрлаташ]
Марий Эл Радио шке пашажым 2005 ийыште Сӱрем тылзын икымше кечынже 6 шагат эрдене тӱҥалын.
Икымше гана эфирышке вӱдышӧ Мурызо Эчан лектын, «Поро эр, Марий Эл» манын. Эн ондак Марий Эл Радион эфирже - 3 шагатат пеле лийын.
Тӱҥалтышыште Марий Эл Радио «Рен-ТВ-Регион 12, Пульс-Радио, Радио Марий Эл» ЗАО-што лийын.
Частота-влак[тӧрлаташ | кодым тӧрлаташ]
| Илымвер | Толкын, МГц | Илымвер | Толкын, МГц |
|---|---|---|---|
| Йошкар-Ола | 105,5 | Морко | 70,82 |
| Маскасола | 73,49 | У Роҥго | 70,82 |
| Юлсер-Ола | 70,70 | Кужэҥер | 72,35 |
| Чыкма | 69,68 | Килемар | 67,61 |
| Шернур | 69,65 | Йӱрнӧ | 72,62 |
| Оршанке | 70,76 | Шеклӓнур | 73,49 |
| Марий Тӱрек | 68,60 | Эмӓнсола | 73,22 |
| У Торъял | 67,16 | Шолэҥер | 69,62 |
Тачысе кечын[тӧрлаташ | кодым тӧрлаташ]
2009 ийын Шорыкйол тылзын Марий Эл Радио реорганизацийым эртен. «МАРИЙ ЭЛ РЕСПУБЛИКЫН АВТОНОМ ТӦНЕЖШЕ „МАРИЙ ЭЛ РАДИО“» (рушла АУ (Автономное Учреждение) Республики Марий Эл «Марий Эл Радио») лийын, кызыт ГАУК «Марий Эл Телерадио» официал лӱмым нумалеш.
2009 ийыште Марий Эл Радио интернетыште йоҥгаш тӱҥалын.
2010 ий мучашыште Марий Эл Радион шке сайтше пашам ышташ тӱҥалын. www.mari-el-radio.ru адрес дене верланен, тыште пытартыш увер, эфирыште кучылтмо материал-влак савыкталтыт, радиом вияш эфирыште колышташ лиеш. 2011 ийыште тиде сайтыштак марий чатым почмо. Кажне кумылан айдеме тушто моло-влак дене ваш возгален кертеш.
Марий Эл Радио чӱчкыдын марий концерт, дискотеке да танцпол-влакым эртара. Эн кугу концертлан «Чоҥышо» (рушла «Строитель») стадионышто ий еда эртарыме концерт шотлалтеш. Марий мурызо-влак, ансамбль-влак йоҥгалтарат. Концерт Радион шочмо кечыжлан пӧлеклалтеш.
Программе-влак[тӧрлаташ | кодым тӧрлаташ]
- «Марий Эл Радион хит-парадше» — эн сай мурым кажне арнясе сайлымаш. Мурызо Эчан вӱда.
- «Мыскара йорвар» — мыскара передаче. Сергей Карпов вӱда.
- «Караоке кас» — йыҥгыртыше-влак шке мурымо мастарлыкыштым ончыктат. Сергей Карпов вӱда.
- «Увер йогын» — тӱнябалсе, Россий да республике кӱкшытысо пытартыш увер-влак. Марина Глушкова ямдыла.
- «Лӱмгече календарь» — лӱмлӧ марий айдеме-влакын шочмо кечышт нерген кажнекечысе рубрике. Володя Матвеев ямдыла.
- «Шӱдыр-влакын мужедмышт» — марий гороскоп. Владимир Аптулаев ямдыла.
- «Мыскара» — кажне кечысе кӱчык передаче. Сергей Карпов ямдыла.
- «Онар тукым» — йоча-влаклан передаче. Владимир Аптулаев ямдыла.
- «Коҥга тӱр воктене» — кажне шуматкечын лекше передаче. Татьяна Соловьёва ямдыла.
- «Кувавайын шондыкшо» — илышлан туныктышо передаче. Володя Матвеев ямдыла.
- «Илыш дене тӧр» — Марий Элын тачысе илышыже.
- «Тиде кечын» — кечын эртыкыште ойыртемже.
Пашам ыштыше-влак[тӧрлаташ | кодым тӧрлаташ]
Кызыт пашам ыштат[тӧрлаташ | кодым тӧрлаташ]
- Ирина Фоминых — директор.
- Володя Матвеев — тӱҥ редактор, вӱдышӧ
- Марина Глушкова — увер редактор, вӱдышӧ
- Михаил Пирогов — компьютер системе администратор
- Елена Эшкинина — спорт программым вӱдышӧ
- Татьяна Соловьёва — вӱдышӧ
- Жанна Фёдорова — вӱдышӧ
- Мурызо Эчан — вӱдышӧ
- Рауль Гарифулин — вӱдышӧ
- Вера Горохова — вӱдышӧ
- Алевтина Бокова — вӱдышӧ
Концерт-влак[тӧрлаташ | кодым тӧрлаташ]
Марий Эл Радио чӱчкыдын марий концерт-влакым эртара, Йошкар-Олаште да Марий Эл мучко. Эн кугу концерт-влак:
- Шочмо кечылан пӧлеклалтше концерт (июль тылзе мучашыште кажне ийын эртаралтеш). 2011 ий гыч концерт «Дружба» стадионышто эртаралтеш.
- «Идалыкысе муро» — кажне ийын эртаралтше концерт-фестиваль. Марий Эл Радион хит-парадше негызеш идалыкысе рейтинг ышталтеш, эн чӱчкыдын чапым сулен налше мурызо Фестивальын гран-при пӧлекым налеш. Моло сеҥыше-влак смс-йӱклымаш гоч ойыралтыт.