1 Вӱдшор

1 Вӱдшор — григориан кечышот почеш идалыкын 91-ше (кужемдыме ийлаште 92) кечыже. Идалык пытыме марте 274 кече кодеш.

Вуйлымаш

Окмакын кечыже але Воштылчык кече палемдалтеш. Тиде кечын чылан ваш–ваш ондалкалат, тӱрлӧ мыскарам ыштат. Ты йӱла Францийыште лектын улмаш. Но ожно «окмак–влакын пайремыштым» 17 Пургыжышто палемденыт.

Кайык пайрем. Тудо 1906-шо ий гыч палемдалтеш. Вӱдшор тылзын икымше кечынже кайыкым аралыме калык кокласе конвенцийыш кидым пыштыме, а Россий тудын деке 1927-ше ийыште ушнен.

Вӱдшор тылзын икымше кечынже Дарья, Иллария, Иннокентий, Мариан, Софья–влакын лӱм кечышт.

1748 ийыште Помпей ола олмышто раскопкым тÿҥалыныт. Тиде ола Везувий вулкан помыжалтмылан кöра йÿлен йомын.
1778 ийыште доллар окса шочын.
1930 ийыште «Голубой ангел» фильмым икымше гана ончыктеныт, тиддеч вара актриса Марлен Дитрих уло тÿнялан палыме лийын.
1938 ийыште Швейцарийыште кофен презентацийже эртен. Тиде йÿышым кумдан кучылташ тÿҥалыныт.

1893 — Тыныш Осып, марий серызе. Чын лÿмжö – Иосиф Алексеевич Борисов. Тудо Юлсер кундем Куршамбал ялеш шочын. Озаҥысе учительский школым, Марпединститутым тунем лекме деч вара, тÿрлö школлаште туныктышылан тыршен. 1937-1943-шо ийлаште йоҥылыш титаклымылан кöра лагерьыште лийын. Вара уэш педагогик пашаш пöртылын. Тыныш Осып – марий театрын шындыме икымше пьесын авторжо. «Закон шӱмлык» спектакльым 1919-ше ийыштак ончыктеныт. Тыгак Тыныш Осып – ятыр тунемме брошюрым, учебникым, йылме шымлымаш пашам савыктен луктын. Суапле пашажлан «Знак Почёта» орден дене палемдалтын.

1941 — Алексей Яковлевич Акишин, шанчыеҥ, Россий Федерацийысе кӱшыл школын сулло пашаҥеже. Пенза кундемысе Ильмино селаште шочын. Йошкар-Олашке 1971-ше ийыште толын да Марий кугыжаныш университетышке пашам ышташ пурен. 5 ий кушкыл-влак кафедрымат вуйлатен. Ял озанлык шанче кандидат, профессор.

1934 — Анна Ивановна Бякова, туныктыш пашаеҥ, Россий Федерацийысе школын сулло туныктышыжо. Паша корныжо Советский посёлкысо 1 №-ан школышто тӱҥалын. Умбакыже вуйлатышын алмаштышыжлан, завучланат тыршен.

1950 — Вячеслав Михайлович Щеглов, Йошкар-Олаште шочын-кушшо спортсмен. 1994-ше ий гыч тудо «Щеглов» лӱман ушемын вуйлатышыжлан шогалын. Автомобиль спорт дене Совет Ушем чепион лӱмымат сулен налын. Олык Ипай лӱмеш премийын лауреатше, Совет Ушем спорт мастер.

Дарьян кечыже. Тиде кечын вÿдшор мÿгыра гын – кеҥеж вашеш шудо нугыдо шочеш. Посна тÿткышым суртводыжлан ойыреныт: тудым пырля кочкаш шинчаш ÿжыныт, лÿмын пучымышым шолтеныт.