Википедий:Модмо вер

Википедий — эрыкан энциклопедий гыч материал

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙЫН ПРОГРАММЫЖЕ

«Родина» партий шкенжын организационный да политик шкевуя улмыжым уэш пӧртылта. Политический кучедалмашке тудо социал-патриотизм шӱлышеш лектеш.

Шке жапыштыже Дмитрий Рогозинын лидер да официальный вуйлатыше улмыж годым «Родина» партийын чыла документше да программыж дене келшен да нуным таче шотыш налын, кызытсе жаплан келшышын шкенан партий стратегийнан тӱҥ корныжым ончыкташ кӱлешлан шотлена.

Пытартыш икмыняр лу ий жапыште тӱнян чыла вережак нелылык шижалтеш, тидыже социальный тӧр огыл улмо, вуйлатыме политик механизмын тоштеммыжлан кӧра пайда иземме, геополитик кӱкшытыштӧ тӱрлӧ вийын кучедалме йӧнжӧ писын вияҥме, энергетик поянлыкым шке кидыш поген налаш тӧчымӧ кучедалмаш дене палдырна.

Кызыт тӱрлӧ событийым виешак вияҥдыме сценарийлан айдеме тунемалтеш да тудлан тидыже кечын шижалтеш. Шалатыме факторым илыш-йӱлаш пурышо морально-нравственный поянлыкын писын иземмыже, кызытсе обществын шыдешкымыже палдырта.

Финанс-экономик, социальный да политик нелылыкын кушмыжо тӱшкан пайдаланыме кызытсе цивилизацийын ончыкылыкшо шотышто шонаш тарата.

Россий кугыжаныш шке историйыштыже цивилизацийын посна типше семын вияҥын, тидыже духовный поянлыкын материальный деч кӱлешанрак улмыж, патриотизм, тӱрлӧ калыкын национальный йӱлажым пагалыме шӱлыш гоч палдырна. Тачысе тӱнямбал нелылык Российысе калык-влакын национальный ойыртемыштлан, Россий Федерацийын тӱнямбалне пеҥгыде суверенитетшылан кугу лӱдыкшым ышта, элыштына социальный нелылыкым вияҥда да кугыжаныш деч ойыртемалтше цивилизацийым, лӱмжӧ тудын – Россий, арален кодаш моткоч кӱлешан мерым ышташ йодеш.

Мемнан элын гражданже-влакын тӱшка национальный патриот идеологий негызеш иктеш чумыргымышт, тыгак социально-политик интерес-шамычын икоян улмышт кӱлыт. Вес семын каласаш гын, политический нацийым ыштыман. Мыланна тидыже эн ондак – калык-влакын – Россий граждан-влакын – ушнымышт. Адакшым «вӱр яндар улмо» принцип дене огыл, а духовный могырым родо-тукым семын, йылме, культура, тӱшка историй да мланде шот дене.

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ шке Программыштыже кызытсе условийыште Российын вияҥме стратегийжын тӱҥ задачыжым палемден. «РОДИНА» ПАРТИЙЫН Программыже – ХХI курымын йодмашыжлан Российын вашмутшо, кызытсе национально-патриотический идеологийын концепцийже.

I. ЖАПЫН ЙОДМАШЫЖЛАН РОССИЙЫН ВАШМУТШО:

Ме тыге шонена: у национально-патриотический тӱняумылымашын негызшылан теве мо шотлалтшаш:

КАЛЫК КУГЫЖАНЫШ. Кучемын да калыкын вашумылымашыштым Российысе пӱтынь калыкын стратегический икоян национально-патриотический интересше-влак гоч чоҥыман. Кугыжаныш, посна тӱшка да общество кеч-могай условийыштат ваштарешла шогышаш огытыл. Мыланна социальный да национальный келшымаш – мер илышыштына закон.

НАЦИОНАЛЬНЫЙ ИКОЯН УЛМО. Россий калык-влак политик наций лийшаш, нуным йӱла, ваш-ваш пагалымаш да ик паша ушен шогышаш улыт.

ШОЧМО МЛАНДЕ. Российын кундем тичмашлыкшым да айдемын праважым да ик эл гыч улшо еҥын национальный лӱмнержым чыла вере арален шогымашым ме моткоч шергакан семын аклена. Шукертсек Российын мландыжлан шотлалтше кундемым элышкына пӧртылтымым ме моткоч сайлан шотлена.

1. Калык кугыжаныш

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ мемнан элын тӱҥ проблемыжлан виян, келшен толшо Россий кугыжанышым ыштыме да вияҥдыме йодышым шотла. Тыгай кугыжаныш граждан-влак сайын илышт да калык чот кушшо манын, чыла шотыштат келшыше условийым ыштышаш. Тидын годым тудо чынжымак калык социальный кугыжаныш лийшаш, йӱлам да футуризм ончык ошкыл вийым ушен шогышаш.

У, писын вашталт шогышо геополитический да социально-экономический илышын чын улмыжо, политикыште ваш келшыдымашын пӱсеммыже (тӱрлӧ политический вий коклаште ваш кучедалмаш, общестын шаланымыже да социальный могырым лунчыргымыжо, кучемым тӱжвачынат да кӧргӧ вечынат темдымаш, вуйлатыше-влак коклаште профессионал шагал улмо, молодежный политикын начар улмыжо) виян да сай кугыжанышым ыштыме шотышто пеш вашке мерым ышташ йодыт.

Лишыл жапыште ик эн тӱҥ задача – кугыжаныш да общество коклаште национально-патриотический икойлык да социальный вашумылымаш негызеш вашумылымашым муаш. Жап, кунамже кугыжанышын пайдалыкшылан кӧра калыкын интересше шотыш налалтын огыл, шеҥгелан кодшаш.

Тачысе кечын гражданин ден кучем коклаште вашкылым вашумылымо, ваш пайдам кондымо принцип почеш чоҥыман, тидын годым калыкым арален шогыман, илышым икшырымын саемдыман, аза шочмашым кугемдыман, айдемылан да гражданинлан, шкеныштыым тӱрлӧ могырым вияҥден кертышт манын, чыла йӧнан условийым ыштыман.

ХХI курымысо Российын уло тугай тӱҥалтышыже, кудыжо элнам вияҥда да граждан-влак вара кугешнен ойлен кертыт: «Кугыжаныш – тиде ме!»

2. Национальный икоян улмо.

Кугыжанышын эн тӱҥ задачыже – Россий калыкым ик политик нацийыш иктеш чумыраш. Таче икшырым илышлан да обществым вияҥдаш национальный пале шот дене граждан-влакым ваштарешла шогалтымаш чаракла. Икоян наций палым кораҥдымаш ксенофобийлан (вес калыкым йот семын ончымаш), кредалаш ямде улшо национализмлан, религий шот дене вурседылмашлан негызым ышта.

Йылме да культура – Россий Федерацийыште чыла калыкын национально-патриотический негызшылан шотлалтыт.

Кызыт Россий культура тугай чапле негыз лийын, кудыжо Российыште да Евразийыште икгайлыкым ушышо пеҥгыде шытен лекше да кушкын шогалше пушеҥгым шочыктен.

Россий цивилизаций духовно-нравственный поянлыкеш негызлалтеш. Лач тудымак аклымаш обществын сӱмырлымыж ваштареш шогышо ик оружий семын ончалтеш.

Россий Федерацийын светский (черке деч ойырлен шогышо) да Конституций почеш арын (совестьын) эрыкан улмыжым шотыш налын, «РОДИНА» ПАРТИЙ, туге гынат, кугыжанышын эн тӱҥ задачыжлан духовный негызым аралымым шотла.

Шуко нациян Россий калыкын духовностьшым да культурыжым угыч вияҥдымаш – ик политический нацийым ышташ моткоч кӱлешан условий. Наций-влак коклаште культура кылым калык коклашке шарен шогыман да вияҥдыман, Россий кугу ешыш ушнышо чыла этнос коклаште, кугыжаныш национальный политикын тӱҥ аспектше-влакым шотыш налын, кутырен келшыме почеш ик позицийым ыштыман.

3. Шочмо мланде

Мемнан цивилизацийын лиймыже граждан-влакын лӱдыкшыдымылыкышт да элнан экономический вияҥмыж дене негызлалтеш.

Российын кумдык тичмашлыкшым аралыме принцип, ик кугыжаныш верч кучедалмаш – могай калык гыч улмым ончыде, кажне чын патриотын тӱҥ задачыже. Ондаксе тукым деч мыланна кодшо вӱраҥше шочмо мланде – пӱтынь калыкын поянлыкше, да мемнан порысна – тудым аралаш да кушкын толшо тукымлан кодаш.

Таче «РОДИНА» ПАРТИЙ политический кучедалмашке «Юмо – каваште, Россий – мландӱмбалне!» лозунг дене ушна.

II. ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙЫН ПРОГРАММЫЖЫН ТӰˆ ПРИНЦИПШЕ-ВЛАК:

1. Нацийым арален кодымаш

Калык чот изем толмаш Российым социальный могырым локтылалтмаш да кумдык тичмашлыкым йомдарымаш дене лӱдыкта. Неолиберализм идеолог-влак ӱшандараш тӧчат гынат, калык шагалемме проблемым вес элла гыч калыкым кондымо дене кораҥдаш ок лий. Калыкым аралымаш, граждан-влакын илышыштым эреак саемден шогымаш, обществым физический да нравственный велым тазаҥдымаш – кугыжанышын тӱҥ йодышыжо!

«РОДИНА» ПАРТИЙ кугыжаныш демографий политикын тӱҥ корныжо-влакым теве кушто ужеш:
   Нацийым арален кодымаш. Калык – эн тӱҥ поянлык.
   Национальный патриотизм идеологийын тӱҥ принципше – йӱлаш савырныше еш институтлан кугыжанышын полышыжо. Йоча-влак элнан ик эн тӱҥ поянлыкшылан шотлалтыт, нунын верч тыршымаш – кугыжанышын тӱҥ задачыже. Обществыште ава-влакын культыштым уэш шочыктыман, шуко шочшан ешым пагалыман да чапландарыман, нунылан окса дене полшыман.
   Самырык еш-влаклан финанс полышым пуымо шотышто программа: тӱрлӧ пайдалан кучылтшаш кредит процентдыме лийшаш, черетан йоча шочмеке, льготан ипотекын ужашыжым тӱлыман, пашам ыштыше ача-ава-влаклан ешартыш окса полышым пуыман.
   Йочам шкетын ончышо-влаклан чыла шотыштат полшыман (ава-влак веле огыл, тыгак тӱрлӧ илыш амаллан кӧра ача-шамычат шочшым шкетын ончен-кушташ тыршат).
   Тулыкеш кодшо да суртдымо-пӧртдымӧ йоча-влакын пролемыштым решатлымаш. Еш йоча пӧрт-влак системым, чыла шотыштат шотан еш-влакын ийготыш шудымо йоча-влакым ашнаш налмым вияҥдыман, полшыман. Российыште кудалтен кодымо йоча лийшаш огыл.
   Шотан кугыжаныш молодежный политика.  Кушкын толшо тукымым патриотизм да духовно-нравственный шӱлышеш воспитатлыме федеральный программым ямдылыман да илышыш пуртыман.
   Физический культурым да таза илыш-йӱлам калык коклашке шарыман. Спорт – чылалан!
   Ондаксе СССР гыч шкенан еҥ-влакым, нуно шочмоэлыш пӧртылаш да Россий гражданствым налаш кумылан улыт гын, шочмо кундемыш пӧртылтымӧ шотышто кугыжаныш программым илышыш пуртыман. Тыгодым чын да пашам ышташ кумылан граждан-влаклан чыла шотыштат полшымо механизмым ямдылыман. Наука да промышленность инновационный отрасльлаште специалист-влак Россий гражданствым эн ондак налшаш улыт.

2.Национальная политика

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ Российыште илыше калык-влакын йӱлаштым пагалыме принцип негызеш, Россий кугу ешыште улшо чыла этносын иктӧр улмыштым шотыш налын, кугыжаныш национальный политикым чоҥаш кӱлмылан шотла.

Национальный политикын тӱҥ направленийже-влак тыгай лийшаш улыт:

   Патриотизм да калыкын икоян улмышт принцип негызеш ик политический партийым ыштымаш.
   Российысе чыла калыкын федеральный, кундемысе да верысе кӱкшытыштӧ иктӧр улмышт верч тыршымаш.
   Кугыжаныш кучем да верысе шкевуя вуйлатыме органлаште, калык чотым шотыш налын, еҥ-влак чот чын лийшаш.
   Кугыжаныш да обществын вийышт дене калык-влак кокласе умылыдымашым кораҥдымаш. Этнический проблема-влакым тӱҥалтыштак решатлыман, а вӱран вашпижмашым «сурт кокласе ӱчашымашлан» шотлыман огыл.
   Российысе калык-влакын культура поянлыкыштым арален кодымо шотышто граждан-влакын шонымашыштым да темлымашыштым кугыжаныш велым шот дене ончыман, национальный культура-влак коклаште вашумылымаш да пырля пашам ыштымаш лийшаш улыт.
   Россий Федерацийын кумдык тичмашлыкше, мутат уке, поянлык, а тудым перегымаш – кугыжанышын да обществын таза чыла вийжын тӱҥ пашашт.
   Россий граждан-влакым духовно-нравственный шӱлышеш воспитатлыме кугыжаныш концепцийым ямдылымаш да илышыш пуртымаш.

Россий Федерацийын национальный политикыжым, Россий кугыжанышым шуко курым жапыште ушен да вияҥден шогышо чыла калыкын интересшым шотыш налын, илышыш пуртыман.

«РОДИНА» ПАРТИЙ  раса да могай калык гыч улмым ончен шыгыремдылмаш, калык-влак кокласе да юмынйӱла шот дене вашумылыдымашым тарватыме, ик калыкын вес калык деч кӱшнырак улмым ончымо ваштареш. Тыгодым ме тыге шонена, кугыжанышын тӱҥ пашажлан тыгак экстремизм ваштареш кучедалмаш шотлалтеш. Граждан-влакын национальный лӱмнерыштым волтымаш лийшаш огыл, тыгак историй фактым шояклымаш, Россий калык-влакын йӱлаш пурышо морально-нравственный нормыштым да юмынйӱлаштым пагалыдымаш лийшаш огытыл.

Кугыжаныш миграций политика кугу верым айлен шога. Элышкына йот элла гыч пашаеҥ-влак толмым эскерен шогыман да тыгодым кугыжанышын экономический йодмашыжым шотыш налман. Тидын годым шулдо паша вийым кучылтын, пояш шонышо, тыгак шке кӱсеныш оксам йышт пыштыме ваштареш да шот деч посна толмо ваштареш кучедалман. Эн ончычак шке калыклан пашам ситарыман.

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ элнан икшырымын вияҥмыж да сеҥымашыж шумыж шотышто Российысе чыла калыкын интересше верч национальный политикым илышыш пуртыман манын шотла.

3. Национальный лӱдыкшыдымылык

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ Вооруженный Вийыште палемдыме жапым служитлымаш – Россий Федерацийын кажне гражданинжын конституционный порысшо да чапше манме дене пӱтынек келша. Ончыкшым Россий Армийын профессиональный негызыш пӱтынек вончымыжым шотыш налын, ме, тачысе жапын йодмыжым сайын пален, лишыл жапыште Россий Федераций Вооруженный Вийын личный составшым тӱрлӧ семын чумырымашым умылена. Тидыже элыштына экономика денат, кызытсе геоплитика денат кылдалтын.

Тыгодым «РОДИНА» ПАРТИЙ национальный лӱдыкшыдымылык шотышто тыгай мерым ышташ кӱлешлан шотла:
   Оксам бюджет гыч эн ондак Вооруженный Вийын кӱлешлыкшылан ойырыман.
     Шкенан элысе оборона да промышленный комплексым кугу паша лектыш дене вияҥдыман, тудын негызеш инновационный технологийым ыштыман да илышыш пуртыман – тидыже военный секторыштат, гражданский экономикын тӱрлӧ шӧрыныштыжӧ кучылталт кертеш.
   Россий Армийын офицер да рядовой составшылан шот дене служитлаш сай условийым ыштыман, военнослужащий-влаклан да нунын ешыштлан илыме вер проблемым решатлыман.
   Военный службын социальный чапшым нӧлталмаш, Вооруженный Вийын имиджшым ыштыман. Россий Армийыште палемдыме жапым (срочный службым) служитлен эртыше-влаклан граждан илышыште умбакыже тунемаш, паша верым муаш да шкем сай могырым ончыкташ сай условийым ыштыман.
   Кыдалаш школын тунемме программышкыже «Граждан-влакым военный службылан ямдылыме негыз» предметым пуртыман. Тӱҥалтыш военный ямдылалтмаш (НВП) призывник-влаклан варажым Вооруженный Вийыште палемдыме жапым служитлаш шинчымашым да мастарлыкым веле огыл пуа, а тыгак самырык тукымым патриотизм шӱлышеш шуараш полша.
   Военный профилян тунемме тӧнеж (заведений)-влакым, национальный лӱдыкшыдымылыкын тачысе кечын йодмыжым шотыш налын, уэш почедыман.
   Казачествылан кугыжаныш велым полшыман, тудын воинский да культура йӱлажым уэш пӧртылтыман. Казак организаций-влак элнан у йӧнан национальный лӱдыкшыдымылыкшын ик негызше семын, Россий Вооруженный Вийын тӱҥ шапашыже лийшаш улыт.
   Тӱрлӧ сарын ветеранже-влакын, тыгак нунын кӱкшытыш нӧлталме граждан-шамычын интересыштым да праваштым аралыман. Шочмоэллан ӱшанле улмыштым ончыктышо еҥ-влакым чапландарыман да нунылан кугыжаныш велым полшыман.
   Россий ДОСААФ системым кушкын толшо тукымым военно-патриотический воспитатлымын ик негызшылан шотлен вияҥдымаш.

4. Калык экономика

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ чыла ончылно шогышо тӱнямбал цивилизацийыште нелылык лекмылан кӧра социально-экономический условийым тӱрыснек шерын лекман да тудым пӱтынек вашталтыман манын шотла. Пале, темын кертдымын пайдаланымаш, либерально-капиталист поянлыкым ончыко лукмаш, посна индивидуум, еҥ да общество, гражданин да кугыжаныш коклаште янлык койышым ончыктымаш да тыгак тыгай койыш Россий калыкым лунчырта да историйыште пале кышам кода.

Ме тыге шонена: элыштына йӧршеш у энономический системым ыштыман, тудыжо граждан-влакын интересыштым аралымашке виктаралтшаш – вес семын каласаш гын, калык экономикыш савырнышаш. Тыгодым пеш писын да пайдалын вияҥше экономикын йӧнжылан сайын вияҥше ончыкылык лийын кертеш.

Калык экономикын тӱҥ корныжо-влак тыгайрак улыт:
   Россий граждан-влаклан паша верым ситарыме шотышто национальный политика. Профессиональный мастарлыкым шуарыме сай системым ыштымаш. Пашаште граждан-влак шкеныштым чыла могырым сайын ончыктен кертышт манын, йӧным ыштымаш.
   Рынке да план почеш вуйлатыме принцип-влакым иктеш ончымаш.
   Стратегический кӱлешан экономикын реальный секторыштыжо план почеш вуйлатыме кугыжаныш-корпоратив ӱзгар-влакым пайдалын кучылтмаш.
   Национальный предпринимательствылан кугыжаныш велым полыш лийшаш, элкӧргӧ рынкыште национальный предпринимательствылан чыла велымат сай йӧн лийшаш. Услуга сферыште кокла да изи бизнес, калыкын йодмыжлан келшышын сатум лукмаш моло деч ончылно шогышаш улыт да тулеч моло. Кугыжаныш ден бизнес монополий ваштареш кучедалшаш улыт.
   Национальный проектлашке кокла да изи бизнесым чолган ушымаш.
   Обществын производствым да пайдаланыме кугытым эскерен шогымыжым кумдаҥдыман. Поян да нужна-влак коклаште ойыртемым иземдыман, социальный иктӧрлык да чынлык принцип-влак ончылно шогышаш улыт.
   Пайдаланыме мер фонд (ОФП) йӧн дене калыклан федеральный, кундемысе да производство кӱкшытыштӧ социальный полышым пуымо индикаторын да механизмын у системыштым ыштымаш. ОФП калыкын икшырымын пайдаланымыж структурыжым ыштыме верч кугыжанышын план почеш вуйлатымыжлан йӧным ыштышаш, а йӧн лийме годым – общество член, социальный тӱшка-влакын социально-экономический положенийыштым тӧраҥдыме шотышто тыршышаш. ОФП гыч тӱлымаш да льгот-шамыч федеральный да кундемысе бюджетла, предприятий да производственный ушем-влакын социально-культурный мероприятийлан да моло кӱлешлан кучылтмо (тиде кугыт гыч налог налалтшаш огыл), страхований рӱдӧ фонд да аграрный секторышто тыршыше пашаеҥ-влаклан социальный полышым пуымо расход кугытышт гыч образованийлан, тӱшка спортлан, социальный кӱлешлыклан да тулеч молылан лийшаш улыт.
   Экономикын реальный секторыштыжо тӱҥ организационный механизм – тиде кӱшыч ӱлыкыла чыла ужашым ваш ушымо кластер шотан метапромышленный системым ыштымаш. Тудыжо промышленностьым, наукым, образованийым, тӱрлӧ ямдылымашым ваш ушышаш. Тыгай проектлашке кокла да изи бизнесым ушымаш.
   Технопаркым, кластер зоным ыштымаш изи да кокла шотан инновационный предприятий-шамычым ышташ посна кумдык семын лийшаш.
   ОПК-ште отрасль-влак кокласе кугыжаныш да частный метапромышленный корпораций-влакым лӱмын ыштымаш.
   Промышленностьышто йӧршеш у инновационный отрасль-влакым почедымаш. Элна стратегический вияҥже манын, научно шымлыме, опытно-конструкторский да технологический пашалан (НИОКР) бюджет гыч окса кугытым ешарыман. Инноваицонный пашашке кокла да изи бизнесым ушыман. Инновационный сферыште тыршыше предприятий-влаклан налог кугытым иземдыман. Инновационный пашам шукташ мешайыше тӧра (чиновник)-влакым мут кучаш шогалтыман.
   Демографий да пенсий проблемылан вашмут – паша верым арален кодымаш, автоматизаций, паша лектышым кугемдымаш да кӱлеш наре пашадарым тӱлымаш.
   Калык озанлыкыште кугу задачым решатлыме годым лӱмын ямдылыме йӧным кучылтмаш.
   Кенета тарваныме йӧным кучылтмаш, тудо варажым пайдам кондышаш, а тудыжо чарен шогалтыдыме сайлыкым пуртышаш.
   Налогым тӱлымашым шотыш кондыман. Производство деч огыл, а услуга деч кугурак налогым погымашке куснымаш. Тыгодым – кокла да изи предпринимательство субъект-влакын парышыштым эскерышаш огытыл.
   Кугыжаныш да частник-влак ваш умылен пашам ыштымашым чолган вияҥдыман.
   Спекуляций дене кылдалтше финанс трансакций деч налогым погымаш.  Спекуляций окса производство окса деч кугурак лийшаш огыл. Тидланже кугыжаныш технологийым вашталташ да вияҥдаш оксам чаманышаш огыл.
   Банк реформа. Сайын вияҥше промышленностьыш кужу жаплан инвестицийым пуымо шотышто банк-влак эреак ямде лийшаш улыт, уке гын, нунын рейтингышт волен кая. Банк-влак тыгак кокла да изи бизнеслан полшышаш улыт, нунын банк сату эре ямде лийшаш, тидын шотыштак стратегический кӱлешан областьлаште кугыжаныш велым гарантий лийшаш.
   Предприятий-шамычым уэмден шогаш, тидын годым нуным пайдалын да кумдан кучылтмо шотышто кугыжаныш задачым шукташ инвестиций кугыжаныш гарантий системым пужен ыштымаш.
   Кенеташте технологийын писын вияҥмыж шотышто задачым решатлаш венчур механизмым кучылтмаш.
   Чынжымак Россий инновацийлан элкӧргӧ йодмашым ыштымаш. Инноваций вияҥмылан тӱҥ йодмаш кугыжаныш велым лийшаш.
   Нацийын негызше да шочмо мландым переген шогышо семын кресаньык-влаклан чыла семынат полшыман. Посна фермер озанлык да коллектив-влак кочкыш-йӧрварым шканышт ситарен кертышт манын, нуным кумылаҥден шогыман. Мыняр шукырак еш мландым кучаш да тудын дене шот дене пайдаланаш тӱҥалеш, тунар сайрак.
    Экономикын аграрный секторыштыжо производственный да потребительский кооператив-влакым ыштымашым сайлан шотлыман. Кумылан-влакын мландым да производственный кугытым налаш йӧнышт лийшаш, тыгодым арендылан льгот дене пайдаланен да варажым нуным шканышт налын кертшаш улыт. Ял озанлыкыште тыршыше-влаклан льгот дене кредит ойыралтшаш.
   1990-2000 ийлаште приватизацийын законлан келшышын эртымыж шотышто йодышым решатлымаш да компенсаций механизмым шотыш кондымаш.

5. Социальный иктӧр улмо, келшымаш.

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙпайдале социальный кугыжанышын стратегический задачыжлан демократий шӱлышеш ыштыме да вияҥдыме, тидын годымак обществын терген шогымыж почеш граждан-влакын сай илышышт да тидлан ӱшанле системым шотла.

Тӱшка калыклан сай лийже манын, кажне айдеме тидын годымак шкеж нергенат мондышаш огыл да шканже илаш чыла йӧным ыштышаш. Калыкыште шарлыше да чылалан келшен толшо правил почеш тиде ок шукталт гын, обществыште «чылашт ваштареш чылаштын сар» манме ылыжеш.

Тидым шотыш налын, «РОДИНА» ПАРТИЙ социальный иктӧрлыкым обществыште чыла сай улмын да икшырымлыкын ик условийже семын онча. Кугыжаныш, куштыжо граждан-влак «йолташын кынервуйжым» огыт шиж (вес семын каласаш гын, ик шочмо кундем гыч улмым огыт шиж гын), чын национальный икойышко шуын да сай ончыкылык корныш лектын ок керт.

Социальный иктӧрлыкын тӱҥ принципше-влак тыгай улыт манын шонена:
   Пашазе-влакын праваштым аралымылан кугыжаныш да бизнес мутым кучат.
   Казнам шолыштмо да коррупций ваштареш нимом чаманыде кучедалмаш, кеч-могай кӱкшытан взяточник, оксам йыгылен налше да вор-влакым наказатлыме йӧным эшеат пеҥгыдемдымаш (граждан праваштым илыш мучкылан поген налаш, профессий дене пашам ышташ йӧршеш чараш, кугыжаныш должностьым айлаш илыш мучкылан чараш да тулеч моло).
   Пашам ыштыше да пашам пуышо-влак кокласе вашкыл вошткойшо лийшаш да законодательствылан келшышаш. Паша этика шке интерес деч кӱшнӧ лийшаш.
   Пашам ыштыше-влакын интересыштым чынжымак арален шогышо эрыкан профессиональный ушем-влакым вияҥдымаш.
   Пенсионер, тӱрлӧ сарын ветеранже, инвалид, нужнанрак илыше моло гражданлан полшымо шотышто кугыжаныш, кучем да бизнес кутырен келшышаш улыт, чыла калыклан йӧнан илыш условийым ыштыман.
ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙРоссий Федерацийын Конституцийыштыже палемдыме социальный кугыжанышым арален кодаш да вияҥдаш кӱлмым сайлан шотла. 

Граждан-влакын сай да оксам тӱлыдымӧ образованийлан да медицинылан, пашалан, тӱрлӧ социальный тӱлымашлан, сай пенсийлан, лӱдыкшыдымылыклан да собственностьым закон почеш перегымылан Конституций почеш правашт – социальный кугыжанышын негызше, тудыж шотышто ӱчашаш ок лий. Нине социальный гарантий-шамыч мер илышыште кутырен келшаш полшат да элнам пайдалын вияҥдаш йӧным ыштат.

Кугыжаныш неолиберальный темлыме почеш «социальный ответственность уто нелылык» деч кораҥшаш огыл, а, мӧҥгешла, граждан-влаклан социальный полышым пуымо шотышто пайдале системым ыштышаш, тудыжо частный да кугыжаныш интересым аралышаш.

Социальный иктӧрлык да кугыжаныш социальный ответственность – национальный патриотизмын чын негызше, кучемын да обществын икоян улмыштым ончыкта, кажне гражданинлан сай лектыш да йӧн дене илаш полша.

III. ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙЫН ЦЕЛЬЖЕ ДА ЗАДАЧЫЖЕ

1. Пӱтынь российысе «Родина» политический партийын  тӱҥ да ончыл верыште шогышо цельже

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙ шкенжын эн тӱҥ цельжылан Россий калыкым арален кодымо, вияҥдыме да калык чот ешарыме йодышым шотла. Тидым илышыш пурташ манын, ме мер калыклан ӱшанышаш улына да политический кучедалмаште сеҥышыш лекшаш улына.

Партийын ончыл верыште шогышо цельжылан шотлалтыт:
   Политический нацийым чумырымаш, вес семын каласаш гын, Россий Федераций калыкым тачысе кечын вияҥ толшо, элнан ончыкылыкшым лунчыртен кертше кеч-могай лӱдыкшӧ деч аралышаш верч иктеш чумыргымаш.
   Россий обществын кеч-могай социальный тӱшкажын интересше шотышто кутырен келшыме да эреак илышыште кучылталтше механизмым ыштымаш.
   Россий Федерацийын чыла субъектшын иктӧр улмыж принципым аралымаш,  нуным социально-экономический икшырымын вияҥдымаш.
   Илышыште кумдан шарлыше коммерций ынже лий манын, элнан экономический вияҥме концепцийжым вашталтымаш, кеч-могай пашаштат социальный сай лектыш лийшаш.

2. Пӱтынь российысе «Родина» политический партийын тӱҥ задачыже

   Граждан-влакын политический кумылыштым кӱлеш велыш савырен да Россий Федерацийыште чынжымак демократийым вияҥден, обществын политический илышыштыже участвоватлымаш.
   Ик политический нацийым ыштышаш верч Россий калыкым иктеш чумырымо да тудын интересше шотышто кутырен келшыме национальный системым ышташ кӱлмым, законлан келшышын чыла йӧным кучылтын, калык коклаште пропагандироватлымаш.
   Граждан-влакын политический образованийышт да воспитанийышт верч тыршымаш, общественный мненийым лукмаш, калыклан «РОДИНА» ПАРТИЙЫН Программыжым да моло документшым, тыгак тӱрлӧ йодыш дене Партийын позицийжым умылтарымаш.
   Мер илышыште Россий граждан-влакын тӱрлӧ йодыш дене лекше шонымашыштым шотыш налаш, нуным тӱшка калык коклашке шараш, кугыжаныш кучемышке да верысе шкевуя вуйлатыше органлашке намиен шукташ.
   Граждан обществыште «РОДИНА» ПАРТИЙЫН позицийжым пеҥгыдемдаш.
   Россий граждан-влакын илышышт чыла шотыштат сай да йӧнан лийже манын, кундемласе да федеральный мер организаций-шамычым иктеш чумырымо пашам ышташ полшен шогаш.
   Социальный инфраструктура, граждан-влаклан социальный сай полыш система икшырымын вияҥышт манын, экономический механизм ден принцип-влакым ямдылыме да илышыш пуртымо шотышто полшаш.
   Депутатыш да кугыжаныш кучем да верысе шкевуя вуйлатыме органлашке сайлалтше моло должностьыш кандидат-влакым (кандидат-влак спискым) ойыраш, палемдыме органлашке сайлымаште да нунын пашаштышт участвоватлымаш.
   Кугыжаныш кучемын законодательный (представительный), тыгак верысе шкевуя вуйлатыше органлаштыже, Партийын Программыштыже ончыктымо цельым илышыш пурташ манын, фракций, депутат группа да депутат-влакын пашаштым эскерен шогаш да ваш келыштарен шогаш.

ПӰТЫНЬ РОССИЙЫСЕ «РОДИНА» ПОЛИТИЧЕСКИЙ ПАРТИЙЫН пашаже шке кумылын, иктӧр улмо шот дене, законлан келшышын да чылалан пале лийме йӧн дене шукталтеш. Партий структурыжым, цельжым, паша формыжым да йӧнжым палемдыме шотышто (федеральный закон ок чаре гын) эрыкан.

Ме ӱшанена, ик корпоративный, социальный але политический тӱшкат шкетын тачысе кечын лӱдыкшыжым чараклен, кораҥден да элнан сай ончыклыкышо верч тыршен ок керт. Тидым национальный патриотизм идеологий дене ушнышо да социально-политический интерес шотышто кутырен келшыше Россий Федерацийын калыкше веле ыштен кертеш.

ШОЧМОЭЛНАН ОНЧЫКЫЛЫКШО МЕМНАН ДЕЧ ШОГА!

ПАШАЛАН ДА ЭЛНАМ АРАЛАШ ЯМДЕ ЛИЙ!! РОССИЙЛАН ЧАП!!!