17 Ага

17 Ага — григориан кечышот почеш идалыкын 137-ше (кужемдыме ийлаште 138) кечыже. Идалык пытыме марте 228 кече кодеш.

Вуйлымаш

1949 — Олег Павлович Войнов, Йошкар-Олан олавуйжо (2005 ий гыч), чоҥышо да муниципал пашаеҥ, Марий Элын сулло чоҥышыжо палемда. Ончыч Йошкар-Оласе тӱрлӧ чоҥышо ушемлаште, вара 15 №-ан СМУ–што пашам ыштен. Газоэлектросварщиклан тӱҥалын да тӱҥ вуйлатыше марте кушкын. 1998 ий гыч Олег Павлович администраций вуйлатышын алмаштышыже, а 2005 ий гыч Йошкар-Олан мэрже.

1937 — Геннадий Алексеевич Пчеловын, партий да озанлык пашаеҥ, Россий Федерацийысе ял озанлыкын сулло пашаеҥже шочмыжлан – 74 ий. Паша корныжо Волжск, У Торъял, Шернур, Оршанка кундемласе комитетлаште да ял озанлык ушемлаште шуйнен. Лач тудын ойжо почеш агробизнес кадрым ямдылыше институтым почмо. Геннадий Алексеевич ты тунемме тӧнежым 9 ий вуйлатен. Тиде суапле пашажлан «Знак Почёта» орден дене палемдалтын.

1937 — Василий Михайлович Чернов, Козьмодемьянск олаште шочын-кушшо музыкант, Марий Эл Республикысе сымыктышын сулло пашаеҥже. Тиде талантан айдеме ик гана веле огыл Юл кундемысе самырык баянист-влак коклаште эртаралтше конкурсышто сеҥышыш лектын. Тунем лекмек, Йошар-Оласе музык училищыште туныктышылан пашам ыштен, «Марий Эл» ансамбльыштат шуаралтын. Лач тудын вуйлатымыж почеш «Эхо» йоча ансамбль «Самоцветы России» фестивальыштат лауреат лӱмым сеҥен налын.

1949 — Игорь Аркадьевич Кудрявцев, Олык Ипай лӱмеш премийын лауреатше, Марий Элын сулло изобретательже. Паша корныжо тӱрыснек Марий политехник институт дене кылдалтын. Тыште тыршыме жапыште 80 наре шанче пашам возен. Тӱҥ шотышто машина чоҥымо автоматизацийыште тӱрлӧ техникым шыҥдарен.

1962 — Людмила Михайловна Смирнова, Марий Эл Республикысе тӱвырын сулло пашаеҥже. Провой кундем Пӱнчылӱвал ялыште шочын. Паша корныжо Кужмарасе музык школ дене кылдалтын: тыште тудо вуйлатыше сомылым шуктен. Мер пашаштат кугу пагалымашым сулен: 7-ше марий погынын делегатше лийын. Суапле пашаже кӱкшын аклалтын: Олык Ипай лӱмеш премийын лауреатше.