25 ага

25 ага (25 май) — григориан кечышот почеш идалыкын 145-ше (кужемдыме ийлаште — 146-шо) кечыже. Идалык пытыме марте 220 кече кодеш.

Пайрем да памятный дате-влак

Ага тылзын коло визымше кечынже школ йӱла почеш «Пытартыш йыҥгыр» пайрем эртаралтеш.
Филолог-влакын кечыже
1993 ийыште тиде кечынак Финляндийыште марий тӱвыра пайрем эртаралтын.

Ага тылзын коло визымше кечынже Герман, Денис–влакын лӱм кечышт.

1869 ийыште Венский оперын пӧртшым почыныт.
1957 ийыште Москваште Совет Ушемын ик эн кугу унагудыжым почыныт. Тудын лӱмжӧ - «Украина».
1963 ийыште Африкысе 30 утла эл кугу конференцийыш чумырген да икоян, келшен илаш, ваш-ваш полшаш манын ятыр документым пеҥдемденыт. Моло вашкелшык коклаште посна верым суверенитетым аралымаш налын шоген.

1949 — Владимир Смирнов-Сэмэҥер, марий серызе, туныктышо, Россий Серызе-влак ушемын йыжъеҥже.
1959 — Алексей Бахтин, руш серызе, почеламутчо, журналист.
1959 — Валерий Николаевич Волков, туныктыш пашаеҥ да спортсмен. 1991-ше ий гыч тудо Верх-Ушнур кыдалаш школышто капкультур предметым вӱдаш тӱҥалын. Тӱрлӧ марафонлаште да спорт таҥасымаште Валерий Николаевич сай лектышым ончыктен шога. Ятыр чап танык дене палемдалтын.
Геннадий Владимирович Григорьев, бард мурызо, семлызе. Параньга район Усола ялыште шочын. Тудын йоҥгалтарыме «Ош куэ», «Усола», «Пустаҥше пӧрт» да моло мурыжо-влакым калыкыште сайын палат. Кок гана самодеятельный автор-влак кокласе фестивальын лауреатше лӱмым налын.

Шнуй Епифанын кечыже. Тудын деч калык пожар деч аралаш йодын кумалын. Кугу тул деч пызле укшат арала – манын ӱшаненыт. Сандене пызле укшым капкаш, омсаш, окнаш кереденыт.

Марий калыкын йӱлаштыжат пызле аралтыш семын кучылталтеш. У пӧртым чоҥымо годым илыме кумдыкышто пызлым шындыман улмаш да тудым нигунамат руаш ок лий. Кугезына-влак тыгай калык палыланат ӱшаненыт: пызле чот шочеш гын – калыкын тазалыкше начарештеш, могай гынат кугу чер толын кертеш.