Ӱжара (газет)

Тиде мутын вес ыҥже-влак улыт. Ӱжара (ыҥ-влак) ончал.

Ӱжара
Тип	газета[d]
Негызлыме	1917 ий 25 Сорла
Паша ыштымым чарнымаш	1918 ий
Йылме	марий
Тӱҥ офис	Озаҥ

«Ӱжара» — марий йылме дене возымо газет. Озаҥыште савыкталтын. Икымше номер 1917 ийыште Сорла тылзын 25-ше кечынже лектын. Тиде газетлан Павел Петрович Глезденев да Валериан Михайлович Васильев негызым пыштеныт. Глезденев тиде газетын икымше номерже-влакым лукташ шке оксажым пуэн. Васильев икымше номерлан ончылмутым серен.

Газетын шочмыжо нерген Глезденев Икымше Пӱтынь Российысе Марий-влакын погын годым увертарен. Газет арнялан кок гана лектын, ик ийлан подписке 6 теҥге шоген. Газет олык марий йылме дене савыкталтын. Руш да суас мут-влакым газетыште кучылталтын огытыл, да "варваризм" олмеш марий мут-влак дене возышо-влак пайдаланаш тыршеныт. Икымше Марий Погынымашын пунчалже почеш, «Ӱжара» газет партийдыме-прогрессивный лийшаш.

«Ӱжарам» лукташ тӱҥалме жапыште тӧрлатызе сомылым иканаште кумытын шуктеныт: В.М. Васильев, Д.И. Адаев да С.Г. Гаврилов (Эпин).

«Ӱжара» газет шуко жап лектын огыл, вашке петыралтын. 1918 ийыште революций лийын. Озаҥыш большевик-влак толыныт, ошо-влак каеныт, садлан газетыште возымо келшен огыл. «Йошкар кече» лӱман у газет лекташ тӱҥалын. «Ӱжара» газет марий калыкын илышыже нерген гына возен, а «Йошкар Кече» газет коммунистический лийын.

Негыз

• «Ӱжара» гыч «Марий Эл» марте. «Марий Эл» газет редакций. Йошкар-Ола, 2002.
• “Марий Эл” газетлан 95 темеш
• (Марий) (Руш.) Марий калыкын погынжо-влак, 1917-2004 ийла. Валентин Колумб лӱмеш рӱдер-тоштер, Йошкар-Ола, 2008. ISBN 5-7590-0990-7