Диджей

Википедий — эрыкан энциклопедий гыч материал
Диджей

Ди́джей (англичанла DJ от англичанла disc jockey — диск-жокей) — ончылгоч возымо сем-влакым калыкыште йоҥгалтарыше айдеме.

Эртымгорно[тӧрлаташ]

Икымше гана «диск-жокей» мутым (англичанла disc jockey) 1935 ийыште американ комментатор Уолтер Уинчелл кучылтын. Тиде мутым Мартин Блок лӱман радиовӱдышӧ шотышто кучылтын. Мартин варажым, икымше диджей лӱмым сулымеке, шӱдыр лийын. Вара «ди-джей» муткылдышым DJ аббревиатур марте кӱчыкемденыт, тышечак диджеинг (англичанла DJing) мут шочын, диджейын пашажым ончыкта.

Паша[тӧрлаташ]

Диджей сем-влакым ончылгоч воза, диск (але грампластинкым) вара клубышто чӱкта, пашам микшер пульт гоч ышта. Эн чӱчкыдын пультышто кок йоҥгалтарыше аппарат (проигрыватель) уло. Проигрывательын пӧрдмӧ писылыкым вашталташ лиеш. Тыге ритм, такт дене ойыртемалтше кок тӱрлӧ клуб семым диджей-влак иктышке ушат (кажне клуб семын тӱҥалтышыште да мучашыште тӱмыр йӱк гына лийшаш). Тыге ик композиций микс маналтеш, иктаж могай мурын аранжировкым вашталтыме дене ыштыме микс ремикс маналтеш. Ремиксын шке тӱрлыкшӧ уло. Кунам мурымым ик муро гыч налыт, а семым вес муро гыч – тыгай ремикс мэшап лӱмым нумалеш.

Кас мучко диджей сем-влакым чӱктылеш, микшер пультышто нуным пырля уша, икмыняр микс ден ремиксым чӱкта – тыгай кӱрылтдымо «концерт» сет (сэт) лӱмдалтеш. Южгунам сетым кок-кум диджей йоҥгалтарен кертеш. Диджей-влакын таҥасымашышт (6 минуташ семйоҥгатарымаш) батл маналтеш.

Сем радиостанцийын йӱк режиссёрым тыгак диджей лӱмдат.