Виногоров, Владислав Александрович

Владислав Виногоров
Шочмаш дене лӱм	Владислав Александрович Виногоров

Владислав Виногоров — марий актер, М. Шкетан лӱмеш Марий калыкле драме театрын артистше.

Илыш корно

Владислав Виногоров Марий драма театрыште Щепкин лÿмеш Кÿшыл театр училищым (институтым) тунем пытарыме деч вара пашам ышта. Тачысе кечылан шке семынже ойыртемалтше актёрын репертуарыштыже руш, йот элласе, мутат уке, марий драматургийын классикше-влакын произведенийлашт почеш шындыме спектакльласе роль-влак шагалынак огытыл. Тудын Йыгнатше (М. Шкетан, «Ачийжат-авийжат»), Шужышо качыже (С.Николаев, «Салика»), Флипотаже да Лояльже (Ж. Б. Мольер, «Тартюф»), Беллиже (Л. Пиранделло, «Айдеме, янлык да чон яндарлык»), Еремеевше (А. Вампилов, «Прошлым летом в Чулимске») да весе-влакат моло актёрын деч палынак ойыртемалтыт. Тÿҥалтыш жапыште В.Виногоров эпизод дене кылдалтше роль-влакым веле модын, туге гынат тыштат тудын усталыкше раш палдырнен.

Образым чоҥышыжла, Владислав шкенжын койышыжымат, мастарлыкшымат раш ончыкта. М. Бартеневын «Сказка об Иванушке-дурачке» спектакльысе Разбойник, З. Долгован «Полдыранат ош пеледышаныштыже» Лöвöй ден Элыксандр, В. Абукаев-Эмгакын «Ош кече йымалне» спектакльыште Ик Еҥ, Ш. Башбековын «Кум кечылан у кува» спектакльыште Элыксан кугыза да моло ролят ончышо-влакын шарнымашешт лакемалт кодын докан. «Алиса, Анфиса, Аниса» спектакльыште тудо Каврийын рольжым моткоч оҥайын модеш. А руш классик А. Островскийын «Чодыра» спектакльыште В. Виногоров помещик Бадаевын образшым моткоч сайын почын пуэн. Мутат уке, А. Слаповскийын «Блин-2» спектакльыште Блинын рольжым ик эн сайлан шотлыман, векат – тиде роль дене В.Виногоров самырык-влак коклаште шарнымашеш кужу жаплан кодын. Тачысе кечылан В. Виногровын репертуарыштыже лучко наре роль уло. Тудо эреак уым кычалеш, кажне образым молын деч ойыртемалтшын чоҥаш тырша.