Абукаев, Валерий Александрович
| Валерий Александрович Абукаев | |
|---|---|
| Валерий Абукаев | |
| Шочын | 1959 ий 22 идым (65 ий) |
| Шочмо вер | Башкир АССР, Мишкан кундем, Токтар ял |
Валерий Абукаев (Валерий Александрович Абукаев) (1960 идым 22, Башкир АССР, Мишкан кундем, Токтар ял) — марий серызе, журналист, драматург. Вес кумдан палыме серызе Вячеслав Абукаев-Эмгакын шольыжо.
Илыш корныжо
[тӧрлаташ | кодым тӧрлаташ]Валерий Абукаев 1960 ий идым тылзын 22-шо кечынже Башкир АССР Мишкан кундем Токтар ялеш кресаньык ешеш шочын. Верысе кандашияш школым тунем пытарымеке Бураевысо да Тынбаевысо кыдалаш школлаште шинчымашым поген. 1978-1980 ийлаште колхозышто пашам ыштен, клубым вуйлатен. Совет Армий радамыште службым эртен. 1984 -1989 ийлаште Марий кугыжаныш университетын историй да филологий факультетыште кӱшын шинчымашым налын. Дипломым налмеке, «Марий комунна» газет редакцийыш ушнен. 1992 ийыште «Кугарня» газетын пашаеҥже, вара Пошкырт Республикыште «Кугарнян» шкенле корреспондентше. Жап эртыме дене Валерий Абукаев шочмо кундемышкыже пӧртылын, Мишкан кундемысе «Келшымаш» газетын тӱҥ редакторын алмаштышыжлан шогалын.
Сылнымут корно
[тӧрлаташ | кодым тӧрлаташ]Почеламут, ойлымаш, кӱчык драматургический произведений-влакым В.Абукаев школышто тунеммыж годымак возкалаш тӱҥалын. «Ямде лий» газет дене пеҥгыде кылым кучен, туштак тудын икымше почеламутшо да ойлымашыже-влак савыкталтыныт. Сылнымут мастарлыкым студент пагытыште шуко поген. Тунамак тудын ойлымашыже-влак «Марий комунна», «Ончыко» журнал да «Эрвий» альманахаште савыкталтыныт. Тиде жапыштак Валерий Абукаев проза да драматургий деке лишкырак лийын. 1992 ийыште Марий самырык театрыште «Чоя мераҥ» йомак-пьесыж почеш спектакль, а Марий кугыжаныш университетын студент театрыштыже «Стипендий» повестьше почеш тыгай лӱманак спектакль шындалтын.
2008 ийыште IV Драматург-влакын Республик кӱкыштысӧ конкурсышто тудын «Токтар-патыр» йомак-пьесыже I степенян диплом дене палемдалтын.
Тӱҥ произведенийже-влак
[тӧрлаташ | кодым тӧрлаташ]- Нӧлпӧ вуян чонан курчак : ойлымаш // Ончыко. 1985. № 1. С. 107—108
- Нӧнчык патыр : С.Эманын йомакше негызеш возымо йомак-пьеса / Вал. Абукаев, В.Абукаев-Эмгак // Эрвий. Шочмо кече. Йошкар-Ола, 1988. С. 130—154
- Стипендий : повесть // Эрвий. Юзо памаш. Йошкар-Ола, 1989. С. 3—64.
- Искусство тӱняшке корно : очерк // Эрвий. Эр пеледыш. Йошкар-Ола, 1990. С. 83—86.
- Унала - вес тӱняшке : ойлымаш; Кож вожын тайныже : изи повесть // Мишкан — мыйын шулдыр. Йошкар-Ола, 1998. С. 39—70.
- Йылмыдыме кувай : повесть ден ойлымаш-влак. Мишкан, 2008. 192 с.