15 Ага

15 Ага — григориан кечышот почеш идалыкын 135-ше (кужемдыме ийлаште 136) кечыже. Идалык пытыме марте 230 кече кодеш.

Вуйлымаш

ООН — Ешын кечыже

1923 — Иван Шуматович Веселов, Кугу Авамланде Сарын геройжо да администраций вуйлатыше. У Торъял кундем Токтарсолаште шочын. Сар тӱҥалме пагыт гычак Йошкар Армий радамыште тушман ваштареш кредалаш тӱҥалын: ончыч взвод, а вара батарей командир лийын. Шке лӱддымылыкшӧ да патырлыкше дене шке салтакше-влакым эреак кумылаҥден шоген. Тале командир кок Йошкар Шӱдыр да Александр Невский лӱмеш орден-влак дене палемдалтын. Демобилизаций деч вара шочмо районысо комитетыште тыршаш тӱҥалын. А вара телевидений да радиовещаний комитет вуйлатышын алмаштышыже лийын. Тиде суапле пашажланат «Знак Почёта» орден да ятыр чап танык дене палемдалтын.

1925 — Эшпай, Андрей Яковлевич, композитор. Тудын возымо 5-ше симфонийже тӱнямбал кӱкшытыштӧ кумдан чапланен. 20-шо курымын ик эн уста семмастарже. Якутий, Мордовий, Чуваший, Марий республикласе сымыктышын сулло пашаеҥже. Совет Ушемын калык артистше. Андрей Эшпайын лӱмжым Козьмодемьянск оласе йоча-влаклан сымыктыш школ нумалеш.

1935 — Иван Григорьевич Иванов, йылмышанчызе, туныктыш пашаеҥ, Марий республикын сулло шанчыеҥже да Россий Федерацийысе кӱшыл школын сулло пашаеҥже. Паша корныжо тӱҥ шотышто Марий кугыжаныш университет дене кылдалтын. Ончыч марий филологий кафедрын вуйлатышыжлан тыршен, вара историй да филологий факультетын деканже лийын. Диалектологий, лексикологий, литератур йылме историй дене кылдалтше 300 наре шанче пашам возен. Марий литератур йылмым вияҥдымаште кугу пашам наҥгаен шога.

1968 — Юрий Петрович Русанов, журналист да тӱвыра пашаеҥ, Олык Ипай лӱмеш кугыжаныш премийын лауреатше. Шкеже Морко кундем Нурӱмбал ял гыч. 1991-ше ий гыч тудо «Кугарня» газет редакцийыште корреспондентлан пашам ышташ тӱҥалын. А 1997-ше ийыште Марий радион редакторжо лийын. Икмыняр жап Юрий Петрович Марий Эл Радиоштат пашам ыштен, но кызыт тудо Шкетан лӱмеш драме театрым вуйлата.

1974 — Светлана Ивановна Никитина, Марий Элын сулло артисткыже шочын. Шкеже Морко вел гыч. Паша корныжо Марий самырык театр дене кылдалтын: тудо тыште шуко рольым устан чоҥен.