Ятманов, Лев Иванович

Википедий — эрыкан энциклопедий гыч материал
Лев Иванович Ятманов
Лев Ятманов
Шочмаш дене лӱм Лев Иванович Ятманов
Шочын 1936 ий 3 шыжа(1936-10-03) (87 ий)
Шочмо вер РСФСР, Владивосток ола
Чап пӧлек да премий

Российысе Савыктыш комитетын Чапкагазше

Лев Ятманов (Лев Иванович Ятманов) (1936 шыжа 3, РСФСР, Владивосток ола) — марий серызе, кусарыше, журналист, Серызе да публицист-влакын тӱнямбал ассоциацийыштын йыжыҥъеҥже (Лондон) (2006).

Илыш корныжо[тӧрлаташ | кодым тӧрлаташ]

Лев Ятманов 1936 ийын шыжа тылзын 3-шо кечынже Владивосток олаште военный врачын ешыштыже шочын. Тудо серызе-влак Мичурин-Ятман ден Мичурин-Азмекейын тукымышт гыч. 1956 ийыште Провой кыдалаш школым пытарен, а 1960 ийыште Горький ялозанлык институтым тунем лектын. Паша корным ялозанлык опытный станцийыште тӱҥалын. Паша деч кӱрылтде Москосо А.М. Горький лӱмеш Литератур институтышто тунемын, тудым 1970 ийыште пытарен. Телевидений редактор лийын, «Молодой коммунист», «Республика» газетлаште ыштен, арня еда лекше «Волга-Урал» савыктышын Марий Элын шке корреспондентше лийын.

«Непутёвый» лӱман икымше ойлымашыже 1964 ийыште «Марийская правда» газетеш лектын. Возымыжо вара моло вереат, ий еда лекше «Дружба» альманахыште, посна сборниклаште савыкталтын. 1960 ийла мучаште – 1970 ийла тӱҥалтыште Марий книга издательствыште тудын кум прозо книгаже ош тӱням ужын: «Сентябрьские звёзды», «Новый дом», «Четвёртый пассажир». Л.Ятмановын произведенийлаштыже кызытсе жапын тургыжландарыше йодышыжо-влак ончыкталтыныт, мораль да этике теме тарваталтын. Эн сай ойлымашыже-влак рӱдӧ савыктышлаштат лектыныт, мутлан, «Наш современник», «Крестьянка» журналлаште, «Сельская жизнь» газетыште.

Л. Ятманов профессионал журналист, сылнымут очеркым мастарын возышо да журналистикын моло жанрже денат устан пайдаланыше автор семын палыме. Идеологий амаллан кӧра тудын «Ложь» лӱман романже ӱстелыште 15 ий киен, 2005 ийыште гына ош тӱням ужын. Романыште 1980 ийласе илыш ончыкталтеш, автор тунамсе идеологийын чыла йыжыҥышкыжат шыҥыше шоям тӱжвак лукташ тыршен.

Л. Ятманов тыгак марий писатель-влакын возымыштымат рушлаш кусарен. В. Косоротовын «Синеглазая весна» ойлымаш сборникше тудын кусарымыж дене посна книга дене лектын. Периодике печатьыште савыкталтше материалже-влак йымалан Л. Иванов шоялӱмым ончыктен.

Российысе Печать комитетын Чап грамотыж дене палемдалтын. 2006 ий гыч Писатель да публицист-влакын тӱнямбал ассоциацийыштын (Лондон) йыжыҥъеҥже.

Тӱҥ произведенийже-влак[тӧрлаташ | кодым тӧрлаташ]

  • Сентябрьские звезды : рассказы. Йошкар-Ола, 1968. 104 с.
  • Новый дом : рассказы. Йошкар-Ола, 1972. 108 с.
  • Рассказы // Дружба. Йошкар-Ола, 1976 ; 1978 ; 1979 ; 1981—1983 ; 1986; 1990.
  • Четвертый пассажир : рассказы. Йошкар-Ола, 1985. 176 с.
  • Рассказы // Короткие встречи. Йошкар-Ола, 2001. С. 437—464.
  • Дом в березовой роще : рассказ // Русское слово Марий Эл. Йошкар-Ола, 2004. С. 190—200.
  • Ложь : роман. Йошкар-Ола, 2005. 444 с.

Кусарыме произведенийже[тӧрлаташ | кодым тӧрлаташ]

  • Косоротов В. Синеглазая весна: рассказы. Йошкар-Ола, 1972. 200 с.

Илышыже да творчествыже нерген литератур[тӧрлаташ | кодым тӧрлаташ]

  • Краткая биогр. справка // Русское слово Марий Эл. Йошкар-Ола, 2004. С. 190.
  • Шамиев Б. Илыш оравам чарен от шогалте // Марий Эл. 2006. 16 авг.
  • Алексеева Т. Все, что я написал, — чистая правда // Инженер. 2006. 20 янв.
  • Алексеева Т. Жить не по лжи // Инженер. 2006. 25 апр.
  • Николаева Н. «Корочки» из Англии // АиФ в Марий Эл. 2006. № 32.
  • Пашкин В. Правдивая «ложь» — это по-нашему : полит. роман Л. Ятманова // Йошкар-Ола. 2006. 26 сент.
  • Васильева С. Истоки рода моего // Передовик. 2006. 17 нояб.
  • МБЭ. Йошкар-Ола, 2007. С. 427.

Чап[тӧрлаташ | кодым тӧрлаташ]

  • Российысе Савыктыш комитетын Чапкагазше.
  • Серызе да публицист-влакын тӱнямбал ассоциацийыштын йыжыҥъеҥже (Лондон) (2006).

Литератур[тӧрлаташ | кодым тӧрлаташ]

  1. Марийская биографическая энциклопедия : 3849 имен в истории Марийского края и марийского народа / авт. и рук. проекта В. Мочаев. - Йошкар-Ола, 2007. С. 427.
  2. Писатели Марий Эл: биобиблиографический справочник / сост.: А.Васинкин, В.Абукаев и др. — Йошкар-Ола: Марийское книжное издательство, 2008. — 752 с. С. 743-744.