Черлидинг

Википедий — эрыкан энциклопедий гыч материал
Черлидинг

Черлидинг (англичанла cheerleading, «cheer» мут — поро кычкыралтыш семын кучылталтеш, «lead» — наҥгаяш, виктараш) — гимнастика, аэробика, шоу-куштымашым иктышке ушышо спорт тӱрлык.

Черлидинг нерген[тӧрлаташ]

Черлидинг Америкыште эше XIX курымын 70-ше ийлаштыже шочын, но лач 100 ий эртымеке гына кумдан шарлен. Спортсмен-влак дене пырля таҥасымашшке чӱчкыдын тӱшка дене ӱдыр-влак кудалыштыт. Рушла нуным «группа поддержки» маныт, нуно таҥасыме деч ончыч, каныш жапыште мотор куштымашым ончыктат, командым куандарыше мутым мурен кычкырат. 1970 ий гыч тыгай тӱшка-влак спортсменлан полшаш тӱҥалыныт, да эркын-эркын ӱдыр-влак кугурак пагалымашым суленыт. Калыкыш лекмылан нуно чот ямдылалтыт, спорт таҥасымаш годым виян, кумылым нӧлтышӧ куштымашым ончыктыман, сандене черлидинг у спорт тӱрлыкыш савырнен. Кызыт черлидинг кок тӱрлӧ уло:

  1. Спортсмен-влаклан полшымаш, федераций, команде, клуб-влак дене пашам ыштымаш. Ончаш-толшо-влакым шке мотор куштымашышт дене куандарыман. Стадион, да спортзаллаште таҥасымаш годым калык чот тургыжлана, сандене нунын чоныштым сурландараш манын, ӱдыр-влакым куштымаш номер дене луктыт. Тыгак, посна командын имиджше саемын кертеш.
  2. Команде-влакын программе да виктарчык почеш эртыше таҥасымаш.

Калык-влак кокласе черлидинг федераций[тӧрлаташ]

Черлидинг

2001 ийыште Калык-влак кокласе черлидинг федераций чоҥалтын, тушко Европысо эл-влак деч посна Японий ушнен. Тачысе кечылан тиде федерацийыш ушненыт: Тайвань, КАР, Гонконг, Индонезий, Японий, Малайзий, Филиппин-влак, Сингапур, Таиланд, Австрий, Даний, Финляндий, Франций, Германий, Венгрий, Ирландий, Норвегий, Россий, Сербий, Черногорий, Словений, Швеций, Украине, Великобританий, Австралий, Барбадос, Боливий, Бразилий, Чили, Колумбий, Коста-Рика, Эквадор, Панаме, Перу, УАШ, Венесуэле.