Австралий

Википедий — эрыкан энциклопедий гыч материал

Австралийэл да континент Океанийыште. Австралий Ушем (англ. Commonwealth of Australia), Австралий (англ. Australia, лат. austrālis гыч - «кечывалвел») - Мландын кечывалвел пелыштыже верланыше кугыжаныш. Рӱдолаже - Канберре. Австралий материкыште, Тасманий отрошто да Индий ден Тихий океанласе икмыняр изи отролаште верланен. Кумдык дене тӱняште кудымшо верым налеш, Мландыште Австралий кугыжаныш гына шкетын уло материкыште верланен.

Лӱм нерген[тӧрлаташ]

Австралий мут латин austrālis гыч шочын. "Кечывалвел" (мланде) семын кусаралтеш. Палыдыме кечывалвел мланде нерген йомакым Акрет Римыште ойленыт, Кокласе Курым пагытысе книгалаште возгаленыт, но чын нигӧ пален огыл. Австралий континент йыр Мэтью Флиндерс капитан корабльже дене эрта, 1814-ше ийыште «Путешествия в Terra Australis» книгам луктеш, «Australia» мут кумдан шарла. Варажым Кечывалвел У Уэльс мландын губернаторжо Лаклан Маккуори тиде мутым Английыш колтымо официалле серышлаште кучылтын. 1817 ийыште Теле тылзын 12 кечынже у колонийлан «Australia» лӱмым пуаш темлен. 1824 ийыште Британ адмиралтействе тиде лӱмым пеҥгыдемден.