Васильев, Андрей Анатольевич
| Андрей Васильев | |
|---|---|
| Файл:Андрей васильев.jpg | |
| Шочмаш дене лӱм | Андрей Анатольевич Васильев |
| Шочын | 1974 ий 5 шорыкйол (50 ий) |
| Шочмо вер | Морко кундем, Чавайнур ял |
Андрей Анатольевич Васильев (1974 ий 5 Шорыкйол, Морко кундем, Чавайнур ял) — марий актер, Марий самырык театрыште тырша.
Илышкорно[тӧрлаташ | кодым тӧрлаташ]
1974 ий 5 Шорыкйолшто Морко кундем Чавайнур ялеш шочын. Школ деч вара 24 номеран Морко профессонально-технический училищыште тунемын. Училище деч вара военно-морской флотыште матрослан служитлен.
1997 ийыште А.Васильев Марий республикысе тÿвыра да сымыктыш колледжын актер отделенийышкыже тунемаш пура. 2001 ий гычын тудо – Марий самырык театрын артистше. Театрыште ыштыме дене пырляк 2008 ий гыч Марий кугыжаныш университетын тÿвыра да сымыктыш факультетыштыже заочно тунемеш.
Театр паша[тӧрлаташ | кодым тӧрлаташ]
А. Васильевын театрыште чоҥымо икымше кугу пашаже - тиде Г.Гордеевын «Ял ÿмбалне мужыр йÿксö» пьесыж почеш шындыме музыкальный комедийште модмо весела кумылан Микытан рольжо. Изиш варарак актер З.Долгован «Шудо шешке» комедийыштыже адакат илалше пöръеҥын - Сапанын образшым мастарын чоҥа гын, Г.Гордеевын «Куп» драмыштыже тудын актер талантше драматизм шÿлышан Иван Яковлевичын образшым чоҥымаште эшеат кумдан почылтеш.
Таче марте А. Васильев театрыште 40 утла рольым модын да калыкын ик эн йöратыме актерышкыжо кушкын шуын. Комедийыште-ма але драмыште тудо чоҥымо образшылан келшыше чиям, ойыртемалтше койыш-шоктышым муын мошта да чыла тидым калык деке намиен шукта. Тыгай улыт тудын келыштарыме Дикойын образше («Гроза» А.Островскийын), Костылёв («На дне» М.Горькийын), Константинов («Жестокие игры» А.Арбузовын), Банкир («Адак омсашке тÿкалат» А.Петровын), Велькаров («Ах, водевиль, водевиль» И.Крылов ден В. Соллогубын).
А 2008 ийыште Андрей Васильев «Майятул» тÿнамбал фестивальыште З.Долгован пьесыж почеш шындыме «Вис-вис пушан орлыкем» драмыште Милиционерын образшым мастарын почын ончыкта да «Кокымшо планан эн сай пöръеҥ роль» номинацийыште фестивальын лауреатше лÿмым сеҥен налеш.
Тылеч посна А. Васильев йомак спектакльлаште - «Приключения Чиполлино», «Против кого дружим», «Хитрюндий великолепный» - йоча-влакым шуко оҥай рольжо-влак дене куандарен шога. Йомак геройым келыштарымаштат актёр кугу мастарлык дене ойыртемалтеш, арам огыл эше 2007 ийыштак «Йошкар-Ола театральная» фестивальыште «Кот в сапогах» йомакыште Корольын образшым почын пуымылан тудо «Майятул» тÿнямбал фестивальысе гаяк «Кокымшо планан эн сай пöръеҥ роль» номинацийыште сеҥыше лийын.