Ельмаков, Юрий Александрович

Википедий — эрыкан энциклопедий гыч материал
Юрий Александрович Ельмаков
Файл:Юрий Александрович Ельмаков.jpg
Шочмо вер У Роҥго кундемысе Петрушкино ял

Юрий Александрович Ельмаков (11 Теле 1937 ий, У Роҥго кундемысе Петрушкино ял) —- сӱретче да график, МАССР тӱвыран сулло пашаеҥже (1984), Российысе сӱретче-влак ушемын еҥже (2005).

Тунеммаш[тӧрлаташ | кодым тӧрлаташ]

Марий Эл тӱвыра министерстве пеленсе изобразительный искусство студийым тунем пытарен. Ончыкылык сӱретчын туныктышыжо кумдан палыме акварелист Р.А. Гусманов лийын. 1967 ий гыч творческий корныжо тудым РСФСР художественный Фондын Марий отделений суретче ешышкыже конда. 1973 ийыште Юрий Ельмаков Козьмодемьянск олаште тиде отделенийын филиалжым почеш. Козьмодемьянскысе, Морко кундем Чавайнур ялысе, «Марий чодыра» национальный паркысе Пӱртӱс музей-влакым келыштарымаште тыршен. Йошкар-Олаште кумдан палыме марий скульптор Ф.Л. Шабердин дене пырля краеведений тоштерлан «Марийская свадьба» диорамым ямдылен. Тыште шуарыме мастарлыкше 1989 ийыште «Балтика-89» (Таллинн) выставкым ямдылыме годым кугу полышым пуэн.

Усталык паша[тӧрлаташ | кодым тӧрлаташ]

Юрий Ельмаковын икымше персональный ончерже 1981 ийыште Козьмодемьянскыште лийын. Советский поселкын краеведческий тоштерже землякшын экспозицийлажым эреак налын шога. Сӱретчын пашаже-влакым Йошкар-Олаште, Москваште, Пермьыште, Таллинныште, Чебоксарыште, Нижнекамскыште, Саранскыште, Саратовышто эртаралтше ончерлаште ужаш лиеш.

Сӱрет-влак[тӧрлаташ | кодым тӧрлаташ]

Художникын ушышкыжо да шӱмышкыжӧ шочмо марий кундемын пӱртӱсшо изинек шыҥен пурен. Поян пӱртӱсым шижын, умылен моштышо мастар йоча жапыштак чодырам, кайык да янлык-влакым шымлен, сонар да кол кучымо сомыллан тунемын. «Теле» (1970), «Тошто Бухарово ял» (1992), «Кӱдырын мурыжо» (1995), «Шӧртньӧ шыже» (2002), «Мушанер» (2003), «Верхушнур пӱя» (2005) монотипий-влак лирике шӱлыш дене темыныт. А «Шошо» произведенийыште южын волгыдын тарванылмыжым, лойыкталтмыжым ужаш лиеш. «Эр юж» (2006) сӱретыште Изи Кундыш эҥерым ончыктымо. Нӧртымӧ кагазеш сӱретлыме технике шкешотан куштылго, волгыдо моторлыкым почын пуа. «Вспугнутый глухарь» (2005) пейзажыште нерен шогышо чодырам кайык-влакын чоҥештымышт помыжалтара. Яндар эр кава, эҥерын «шепкаште» лӱҥгалтмыже «Малый Кундыш» акварельыште мастарын ончыктымо. Пӱтынек ужар-шуналге тӱс дене сӧрастарыме «Грязный затон» ден таҥастарымаште, тиде сӱрет чапле чия тӱсшӧ дене сымыстара. А «Ашламаш» акварельже кумдык композицийже дене шинчаш перна. «Орш-влак» акварель «Марий чодыра» композицийыш пура. Чодыран ялыште теле пӱртӱсым автор кӧргӧ шижмашыже, йӧратымашыже гоч почын ончыктен: лум ден леведалтше чодыраште йошкар кайык-влак чонышто тӱрлӧ шижмашым, шонымаш толкыным тарватат.

Тыгак ончо[тӧрлаташ | кодым тӧрлаташ]