Сушкина, Светлана Сергеевна
| Светлана Сушкина | |
|---|---|
| Светлана Сергеевна Сушкина | |
| Файл:Светлана Сушкина.jpg | |
| Шочын | 1946 ий 14 шорыкйол (78 ий) |
| Шочмо вер | Марий Тӱрек кундем |
| Чап пӧлек да премий | |
Светлана Сушкина (14 Шорыкйол 1946 ий Марий Тӱрек кундемысе Кукурем ял) — марий мурызо, йӱкшӧ — мецц-сопрано. Марий АССР-ын сулло артисткыже (1981 ий), Марий Эл Республикын калык артисткыже (1991 ий), Йыван Кырла лÿмеш театральный премийын лауреатше (2001 ий).
Ӱмыргорно
[тӧрлаташ | кодым тӧрлаташ]Светлана Сергеевна Сушкина 1946 ийын 14 Шорыкйол Марий Тӱрек кундемысе Кукурем ялыште шочын. Изинек ава деч посна кодын. Ачаже вес ватым налын да ешышт шуко икшыван лийын. 10 ияш Поранчасе школ-интернатыш логалын. Интернатыште шуко тÿрлӧ кружок лийын. Светлана спортивный да музыкальныйыш коштын. Ече дене куржталмаште результатше сай лийын, музыкальный кружокышто скрипкам шокташ тунемын. Концертлаште эше солистка семын мурымат мурен.
1961 ийыште Йошкар-Олашке толешат, ик ий культпросветучилищыште тунемеш. Стипендий изи, полшышо уке. Илыш нелылыкым шижешат, Иваново область, Фурманово оласе куымо фабрикыш пашам ышташ кая. Тушто кум ий тырша. Яра жапыште самодеятельностьыш да кастене тунемме школыш коштеш. Тыге кыдалаш образованийым налеш. Вара уэш Йошкар-Олашке толын, «Электроавтоматика» заводышто пашам ышташ тÿҥалеш. Тиде кечылаштак заводысо самодеятельностьын занятийышкыже мия да мурызо-влак деке ушна.
1968 ийыште Йошкар-Олаште музыкальный театрым почыныт. Тиде театрлан хорым погаш кÿлеш лийын. Сандене оласе уремлаште увертарымашым сакаленыт. Увертарымашым лудшо ÿдырамаш-влак Светланалан театрысе колыштмашыш пурен лекташ темлен ойленыт. Светлана тушко миен, тудым хорыш налыныт. Тыгутлаштак музыкальный училищыш тунемаш пура. Кумдан палыме педагог Ф.Е.Олейникован классышкыже логалеш. Тудын темлымыж денак Светлана Озаҥысе консерваторийыш тунемаш кая.
1977 ийыште консерваторийым тунем пытарымек, Э.Сапаев лÿмеш опер да балет театрыш пашам ышташ толеш. Тыште меццо-сопрано йÿкан Светлана Сушкинан икымше пашаже Д.Россинин «Севильский цирюльник» оперыште Розинан партийже лийын. Ты рольым кызытат йӧрата. Марий оперлаште мурашыже пернен. «Акпатырыште» Марфа ден Эвикам, «Алдиарыште» Сулийым, а Н.Арбанын «Кеҥеж йÿд» опереттыштыже Тамара ден Ольган рольыштым модын.
Светлана Сергеевна театрысе паша деч посна тÿрлӧ правительственный да шефский концертлаштат пешак чулым лийын. Шуко гана музыкальный училищын залыштыже концертым ыштен. Тушто Рахманиновын, Чайковскийын, йот элласе композитор Бетховенын, Бахын, Вердин, Россинин произведенийыштым мурен. Поснак финн-угор калык-влакын мурыштым сценыш лукмыж дене кумдан палыме мурызыш савырнен. Тÿрлӧ коллектив дене пырля Венгрийышке, Эстонийышке коштын. Шке жапыштыже Москвасе Кугу театрыште стажировкым эртен (1986 ий). Тушто П.Маскиньин «Сельская честь» оперыштыже ик партийым мурен.
Важ
[тӧрлаташ | кодым тӧрлаташ]- Газетов В.М. Колымшо курымысо марий мурызо-влак («Марийские певцы двадцатого века»). Йошкар-Ола, 2004. — 60 с.
- Марийский республиканский колледж культуры и искусств им. И.С.Палантая. Через тернии к звёздам: Страницы истории вокального класса Ф.Е.Олейниковой / Составитель и автор биографических очерков Л.Л.Женжурист. — Йошкар-Ола, 2007. — 104 с.
- В.Крылов. Артисты Республики Марий Эл. Очерк // «ОНЧЫКО», 2002 ий, №5 (467).
- Смоленцева Л.П. Ший гай волгалт илыза: илыш-йÿлам шымлыше книга. Живите, сверкая серебром: научно-популярная книга. - Йошкар-Ола, 2011. - 92 с.