Кышкар:Тидым палаш оҥай/27 Кылме 2010

Кылме тылзын 27 кечынже теҥыз пехотын пайремже палемдалтеш.

Кӧ шочын

Тиде кечын шке шочмо кечыжым Марий Элын сулло журналистше Лидия Васильевна Семёнова палемда. Тудо 1962-шо ийыште Морко район Шеҥше селаште шочын-кушкын. Ятыр ий «Кугарня» газет редакцийыштат тыршен, но 2004-ше ийыште «Ямде лий» газет редакций ешышке уэш пӧртылын да вуйлатыше сомыллан пижын.

47 ияш пайремжым кумдан палыме артист, Марий Элын калык артистше Михаил Юрьевич Мосунов палемда. Музык дек 21 ияш улмыж годым шӱмаҥын. 1998-ше ийыште Марий кугыжаныш филармонийын солистше лийын. «Песня России» конкурсышто лауреат лӱм дене палемдалтын да 2002-шо ийыште Москваште эртаралтше «Виктория» салтак-влак муро конкурсышто гран-прим сеҥен налын.

Мордва кундемын эргыже, ялозанлык пашаеҥ, Марий республикын сулло шанчыеҥже Михаил Михайлович Котовын шочмыжлан 71 ий темеш. Ончычсо паша корныжо ятыр ушемла дене кылдалтын. Марий кугыжаныш техник университетыште чодыра озанлык факультетын деканже лийын. Кызыт гын чодыра селекций кафедрым вуйлата. Ял озанлык шанче кандидат. Академик.

Моткоч кугу лӱмгечым таче тазалык аралтыш пашаеҥ, Марий республикын сулло эмлызыже Галина Сергеевна Рыбакова палемда. Угарманысе мединститутым тунем лекмек, Йошкар-Оласе 3-шо №-ан поликлиникыште терапевтлан тыршаш тӱҥалын. 5 ий Совет Ушем кӱшыл погынын депутатше лийын. Суапле пашажлан ятыр чап танык дене палемдалтын.

А 1957-ше ийыште тӱвыра пашаеҥ Светлана Васильевна Гаврилова шочын. Шкеже тудо Провой кундем Пӱнчылӱвал ял гыч. Паша корныжо районысо тӱвыра пӧлка дене кылдалтын, тушто тудо мурызо семынат шуаралтеш. Тыгак Светлана Васильевна мыланна уста тӱрлызӧ семын палыме. Мер пашаштат тудо кугу пагалымашым сулен.

Лӱмгече

Кылме тылзын 27 кечынже Александр, Алексей, Анна, Аристарх, Василий, Виктор, Гаврила, Григорий, Дмитрий, Михаил, Николай, Пётр, Сергей, Фёдор, Филипп да Иосиф–влакын лӱм кечышт.