Кышкар:Портал:Географий/Ойырымо статья
Вӱлеҥер, Мари-Ошай (рушла Мари-Ошаево) - Россий, Киров велыште, Пыжанъю кундемыште верланыше ял. Вӱлеҥер - Марий-Ошаевский ял шотан илемын рӱдерже. Илыше еҥ-влак коклаште кас-йӱдвел марий-влак (маре) утларак улыт, сандене тиде ялым Киров велысе марий тӱвыра рӱдерлан сайленыт. Ял кок пелылан шелалтеш - Ӱлыл Вӱлеҥер да Кӱшыл Вӱлеҥер. Кок пеле коклаште кугорно да изи олык верланен. Туге гынат ик яллан шотлалтыт, вольыкым пырля кӱтат.
90-ше ийлаште Йошкар-Ола гыч Вӱлеҥер марте кугарня, шуматкече, рушарнян рейс автобус коштын. Калык чот иземме дене 2005 ийыште автобус коштмым чареныт. Тачысе кечын кӧ Марий Элыш кайынеже - Пыжанъю марте эн ончыч мийыман. Пыжанъю марте кугорно гоч 5 меҥге.
Ялыште Киров велысе марий тӱвыра рӱдер верланен. Кызыт Алевтина Чельникова вуйлата. Йоча-влак кушташ, мураш коштыт, кугарнян дискотеке-влак эртат, рӱдер пайрем, концерт-влакым эртара. Пайрем-влак коклаште эн кугу - кеҥежымсе Пеледыш пайрем. (умбакыже…)