Кулалаева, Нина Алексеевна

Нина Алексеевна Кулалаева (Бабина) (1964, 16 Теле, Марий АССР, Маска район, Шеклянур ял) – марий шанчызе, туныктышо, педагогике шанче кандидат.

Илыш корныжо

Нина Алексеевна Кулалаева 1964 ийыште Шеклянур ялеш шочын.  

1972–1980 ийлаште Маска районысо Шеклянур тӱҥ школышто, 1980–1982 ийлаште Руэм кыдалаш школышто тунемын.

1987 ийыште Н.К. Крупская лӱмеш Марий кугыжаныш институтын историй да филологий факультетшым «Национальный школышто руш йылме да литератур» специальность дене тунем пытарен.  

Распределений почеш Пижме тӱҥ (вараже – кыдалаш) школышто руш йылмым да литературым туныкта. Йоча-влакын да нунын ача-аваштын кутырымо йылмышт тудлан оҥай лийын да шанче интересшым шочыктен. Кугырак ийготан марий-влак тиде кундемыште шке коклаштышт марла кутырен кертыныт гын, самырык-влак руш йылмым кучылтыныт, но марла шукышт сайын умыленыт, кудо-иктыже кугырак-шамычлан марла вашештенат моштен. Йоча-влак рушла гына кутыреныт, тыгодым ача-аваштын марла мутланымыштым умылен кертыныт.

Школышто краеведений кружокым вӱден, йоча-влаклан шочмо кундемын историйже, фольклоржо негызеш марий калыкын шкешотан улмыжым ончыкташ тыршен.

Школышто пашам ыштымыж годымак марий йылмым кугыжаныш йылме семын тунеммме аспект-влакым шымлаш тӱҥалеш.

Тиде пашам умбыкыже Россий образований министерстве пеленсе образованийын национал проблемыже-влакым шымлыше институтын марий филиалыште пашам ыштымыж годым шуя.

1994 ийыште тиде институтын аспирантурышкыжо очный формо дене тунемаш пура да 1998 ийыште Москваште "Методика обучения марийском языку учащихся начальных классов (словообразовательный аспект)" темылан кандидатлык диссертацийым арала. Шанче вуйлатышыже – Л.В. Смирнова (Москва).

Аспирантур деч вара институтын марий филиалышкыже пӧртылеш да шанче пашажым умбаке шуя. Автор коллективлаште марий йылмылан палыдыме-влакым туныктымо  шотышто коммуникативный методике негызеш концепцийым да программым ямдыла, марий кугыжаныш йылмым туныктышо-влак дене Марий образований институтын курслаштыже пашам ышта, лекций-влакым лудеш.

2005 ий гыч Москваште ила.

Шанче пашаже-влак

• Кугыжаныш марий йылме программе: I–XI класс / Г.С. Крылова, Н.А. Кулалаева, В.В. Константинова, Р.П. Игнаева. Йошкар-Ола: Марий туныктыш ин-т, 2001. 96 с.
• Кугыжаныш марий йылме программе : I–XI класс / В.В. Константинова, Г.С. Крылова, Н.А. Кулалаева, Р.П. Игнаева. Йошкар-Ола: Мар. образований ин-т, 2011. 109 с.
• Проблема национальных языков в региональной образовательной политике (на материале Республики Марий Эл) / Р.А. Кудрявцева, Н.А. Кулалаева, В.И. Шабыков // Язык и общество на пороге нового тысячелетия: итоги и перспективы: тезисы докладов международной конференции. М.: Эдиториал УРСС, 2001. С. 276-278.