Викиувер: Марий Элыште Российысе калыкым возен налмашлан ямдылалтмаш кая

Википедий — эрыкан энциклопедий гыч материал
Перейти к навигации Перейти к поиску

Марий Элыште Российысе калыкым возен налмашлан ямдылалтмаш кая. Правительстве пӧртыштӧ преписьлан ямдылалтме да эртарыме шотышто Республикысе комиссийын заседанийже лийын.

Элнан историйыштыже 12-шо перепись тений 1-ше гыч 31-ше октябрь марте эрта. Совещанийым Правительстве председательын икымше алмаштышыже Михаил Васютин вӱден.

Тудо палемден: перепись тӱҥалмешке 8 тылзе кодеш. Сандене чыла мероприятийым чаткан ямдылыман, калык коклаште умылтарыме да увер дене палдарыме пашам эртарыман.

Тиде сомылылан ямдылалтме нерген Маристатым вуйлатыше Александр Целищев ойлен. Тудын мутшо почеш тений возен налме паша йӧнан формат дене лиеш. Еҥ-влак переписьыш шке семын интернет полшымо денат, молгунамсе семынак йодыштмаш гочат ушнен кертыт. Кугыжаныш да муниципал полышын единый порталыштыже стандарт записьым ыштыше-влак переписной кагазым шкаланыштат, ешыштланат возен кертыт. Интернет переписль дене пырля переписчик-влак планшет дене чыла пачер, пӧрт, илыме верла гоч эртат. Эре илыме вер деч посна переписьым кеч-могай участкыште да вес олаштат эрташ лиеш.

Йодыштмашым эрташ шонышо-влаклан волонтёр-шамыч полшаш тӱналыт. Кызыт верлаште уремлам, пӧртлам ончыктышо пале-влакым тергат. Ситыдымаш верештеш гын, тудым вигак кораҥдышаш улыт. Заседанийын лектышыже почеш республикысе комиссийын паша планжым пеҥгыдемдыме.

«Марий Эл» кугыжаныш теле да радио компанийын сайтыштыже лудаш