Крылова, Алина Викторовна

Дата рождения: 00.00.1937

Информация: Алина Викторовна Крылова 1937 ийыште Медведево районысо Шихмамат ялыште марий кресаньык ешеш шочын. Каласаш кӱлеш, композитор Кузьма ден Никита Смирновмытат тушечак улыт.

- Шихмаматыште гармоньым шокташ, мураш-кушташ чылан йӧратеныт, изинек музыка дек шӱмаҥыныт. Мыят калык мурым, такмак-влакым мураш йӧратенам. Муро дене илаш каньыле, тудо тыйым куандара, илышетым сӧрастара, - ойла Алина Викторовна.

Алина Крылован аваже, Фекла Артемьевна Короткова, «Марий коммуна» газетыште корректорлан ыштен. Шке пашажлан кумылаҥдаш манын, тудо ӱдыржым Уфасе полиграфический училищыш тунемаш колта. Туштат ӱдырым художественный самодеятельность утларак сымыстарен. Алинан яндар йӱкшӧ, пӱсӧ музыкальный шижмашыже кеч-кӧнат кумылжым савырен.

Училищым тунем пытарымеке, Йошкар-Олашке пашам ышташ толеш. Мурызылан тунемаш шонымашыже ӱдырым 1958 ийыште Палантай лӱмеш музыкальный училищыш конда, а ныл ий гыч тудо Озаҥ оласе консерваторийын студенткыже лиеш. Консерваторий деч вара икмыняр ий Йошкар-Оласе музыкальный театрыште пашам ышта. Тыште Э.Сапаевын «Акпатыр» оперыштыже Эвикан, И.Молотовык «Элнет» оперыштыже Чачийын партийыштым мура.

Ешан да икшыван ӱдырамашлан театрыште пашам ышташ йӧндымырак лийын, сандене икмыняр жап гыч музыкальный училищыш, туныктымо пашашке кусна. Тыште ынде кумло ий тырша. А.Крылован ученикше-влак, профессиональный мурызо лийын, элнан тӱрлӧ олалаштыже пашам ыштат. Курык марий ӱдыр Лидия Ларькова, училищым тунем пытарымеке, икмыняр ий Марий филармонийыште пашам ыштен. Кызыт марийже дене пырля Кубанский хорышто мура. Александр Литвинов Астраханский консерваторийым тунем пытарен, Красноярский оперный театрыште пашам ышта. Николай Безруков Горький оласе оперный театрыште мура. Лидия Бочкарева (Ороспаева) Ленинградысе коксерваторийым тунем пытарен, кызыт Э.Сапаев лӱмеш опер да балет театрыште солистка улеш. А курык марий ӱдыр Елена Никитина, консерваторийым тунем пытарымеке, Москваште Галина Вишневскаян организоватлыме аспирантурышто тунемеш. Ты марте марий мурызо кокла гыч аспирантурым Галина Окунева-Ластовка гына пытарен ыле, ынде кокымшо мурызына тыгай кӱкшытыш кӱзен шуын.

Алина Викторовнан кид йымач лекше чыла мурызо-влакым шотлаш гын, ынде витле нарышкат шуэш, очыни. Тышечын А.Крылован паша лектышыже тӱвыргӧ улмым раш ужына.

А.Крылован ятыр мурыжым «Мелодия» Всесоюзный фирма грампластинкыш возен. Тушто - марий калык муро, арий ден ариозо, верысе композитор-влакын произведенийышт. Саде пластинка гыч марий муро-влакым ойырен налын, венгр таҥна-влак вес пластинкым луктыныт. Тыге А.Крылован йӱкшӧ Венгрийыште да моло элыштат йоҥга.

1992 ийыште Алина Викторовналан Марий АССР культурын заслуженный пашаеҥже чап лӱмым пуымо. Алина Викторовнам поро ава семынат палемдаш лиеш. Кок эргым ончен куштен. Кугуракше, Володя, музыкальный училищым тунем пытарен, кызыт туштак концертмейстерлан ышта. Изиракшат, Иван, музыкальный школышто кларнет дене шокташ тунем лектын. Вара МарГТУ-м тунем пытарен.