Гордий кылдыш

Акрет годсо грек-влак деч тыгай каласымаш кодын: Фригий кугыжа Гордий шке колесницешыже пеш оҥайын пышкемым кылден. Но саде пышкемым иктат руден моштен огыл. Калык коклаште шомак коштеш улмаш: кӧ тудым руден кертеш, тудо Азий мландылан оза лиеш. Александр Македонский — Македон кугыжа Филиппын эргыже — ачаж колымеке, кугыжалан шогалмекше, чумыр грек мландым сеҥен налын да пеш кугу салтакым поген. Персий ваштареш кредалаш каен. Изи Азий мландышке теҥыз гоч вончымекше, Фригийышкат логалын. Тушто Александр Македонскийлан Гордий кугыжан кылдышыжым ончыктен улыт. Александр Македонский кылдышым руден шоген огыл, писе кердыж дене тунамак руал шуэн.

Теве тышечын тыгай ой лектын: «Гордий кылдышым руал шуаш» («Разрубить Гордиев узел»).

Кызыт иктаж пеш сложный пашам писын, йӧршын шуктымым «Гордий кылдышым руал шуэн» маныт.