Футбол

Футбол мече

Футбо́л (англичанла football - «йол мече») — команде дене таҥасыме спорт тӱрлык. Модмашште тӱҥ - тавалышын капкашкыже мечым пурташ, да шке капкам оролаш. Тачысе кечылан футбол - тӱняште эн чот ончымо спорт тӱрлык; спортсмен-влак кокла гыч эн шукын лач футболыштак шуаралтыт.

Эртымгорно

Тачысе футбол гае модмаш-влак ожнысек шуко калыкын лиеденыт, но икымше виктарчык-влак 1848-ше ийыште возалтыныт. Футболын шочмо кечыжлан 1863 ий шотлалтеш, тунам икымше футбол Ассоциацийым чоҥеныт, шотан виктарчык-влакым возеныт. Но тыгай сынан модмашлан тӱҥалтышым акрет жапыштак пуеныт. Мутлан, Египет, Германий, Китайыште футбол гае модмаш-влак лиеденыт. Мемнан футболын кугезе родыжлан гарпастум модмашым шотлаш лиеш. Тудым Италийыште шонен луктыныт. Но кунам англичан-влак футбол дене модаш тӱҥалыныт, гарпастум писын мондалтын. У модмаш уло тӱня мучко шарлен.

Модмаш виктарчык

Посна налме футбол модмаш матч маналтеш, ик матч кок ужаш (тайм) гыч шога, кажныже - 45 минут. Кок тайм коклаште 15 минут кужытан каныме жап лийышаш. Каналтымеке, кокымшо таймыште команде-влак капка дене вашталтыт. Модмашшке иканаште кок команде ушна. Кажныштыже - 7 гыч 11 еҥ марте лийын кертеш. Команде гыч ик еҥ (капкаорол) шке капка воктеныже палемдыме верыште (штрафной площадь) кид дене модын кертеш, тудо шке капкажым мече пурымо деч аралышаш. Моло модшо-влаклан кид дене мечым тарваташ ок лий. Кажне футболистын шке пашаже. Полузащитник - пасу покшелне модыт, нуно защитник але форвард-влаклан полшат. Форвард (нападающий) тавалышын капка деке лишкырак пурышаш улыт, нунын пашашт - голым пуртылаш. Модмашште тӱҥ - шукырак мечым тавалышын капкашкыже пурташ, да шке капкам гол деч аралаш. Могай команде шукырак голым пурта - тудак сеҥышыш лектеш. Кок тайм жапыште счет ик гай гын, але ничья дене матч пыта, але регламент почеш сеҥышым ойырат. Арбитр ешарыме жапым пуен кертеш (эше кок тайм, 15 минут гыч кажныже). Тӱҥ да ешарыме жап коклаште каныме жап лийышаш. А кок ешарыме там коклаште лач капка дене вашталташ жапым гына пуат. Ик жапыште футбол модмашште "шӧртньӧ гол" правиле лийын - могай команде голым эн ончыч пурта - тудо сеҥа. Тачысе кечын ешарыме жап почеш сеҥыше ой ойыралт гын матч деч вара пенальти-м чумаш тӱҥалыт: капка деч 11 метр тора гыч вич гана тӱрлӧ модшо-влак мечым чумат. Пенальти дене пуртымо гол-влакын чотышт когынек командын ик гай лиеш гын, пенальти-м почыла, мужыр дене чумат. Кӧ мечым капкашке пуртен ок керт - тудо сеҥалтеш.

Футбол тӱнямбалне

ФИФА-н палдарымыж почеш, 2001 ийыште Мландыште футбол дене 250 миллион еҥ модын. Нунын кокла гыч 20 миллион - ӱдырамаш-влак. 1,5 миллион команде да 300 000 профессионал клуб регистрацийыш пурен. Эл-влак коклаште икымше верыште АУШ (18 миллион еҥ, 40 % ӱдырамаш-влак), вара Индонезий (10 миллион), Мексике (7,4 миллион), Китай (7,2 миллион), Бразилий (7 миллион), Германий (6,2 миллион), Бангладеш (5,2 миллион), Италий (4 миллион), Россий (3,8 миллион).

Модмашын лӱм-влакше

Ик модмашым весе деч ойырашлан тичмаш англичан лӱмым (англ. association football) пуртеныт. Пытартыш жапыште футболын шуко тӱрлыкшӧ шочын, мутлан, регби (англ. rugby football). 1880-ше ийылаште Америкыште «соккер» (англ. soccer) мут шочын. Тыге футболым лӱмденыт, но Английыште тиде мут дене шке модмашыштым огыт лӱмдӧ. Моло йылмылаште модмашым але англичан мут дене лӱмдат (кузе Российыште - футбол, Португалийыште - порт. futebol); але шке йылмыш кусарат, кузе немыч (нем. Fußball), грек (греч. ποδόσφαιρο), финн (фин. jalkapallo), иврит (ивр. כדורגל)‎ да карел — (карел. jalgamiäččy) йылмылаште; але "чумаш", "йол" мутым вашталтымеке у мутым чоҥат, кузе итальян (итал. calcio), хорват (хорв. nogomet) йылмылаште. «Football» мутым, калык-влак кокласе мут семын ФИФА ден КОК (Калык-влак кокласе Олимпий Комитет) кучылтыт.

Футбол модмашын тӱрлыкшӧ

Тиде модмашын шуко тӱрлыкшӧ уло. Футдаблбол (кок мече дене модыт), пляж футбол (ошма валне модыт), футзал (мини-футбол) (спортзалыште модыт), урем футбол (кеч кушто, кеч мыняр модшо-влак дене эрта), куп футбол (купышто модыт), футбол фристайл (финт, трюк-влакым ончыктымаш).

Тыгак ончо

• Футбол дене тӱнямбал чемпионат
• ФИФА
• Лионель Месси