Яндак, Леонид Логинович

Википедий — эрыкан энциклопедий гыч материал

Леонид Яндак (Леонид Логинович Яндаков) 1933 ийыште Морко кундемыште Шӱргыялеш шочын. Морко педучилищыште да Марпединститутышто шинчымашым поген. Школышто, Юлсер да Морко ронолаште, комсомол Марий обкомышто, «Марий коммуна» газет редакцийыште, Марий радиошто да телевиденийыште, угыч «Марий коммуна» газет редакцийыште тыршен.

1975 ийыште «Ончыко» журналеш «Сар кыша» повестьше лектын. 80—90 ийлаште «Марий коммуна» газетеш «Печкалтше тымык» повестьше, ятыр очеркше савыкталтыныт.

Калык театрь «Пеледыш пайрем», «Воштылаш гын, воштылаш», Марий кугыжаныш театр «Тулык ава», «Пусаксолаште томаша», «Пелчан кугыжа» пьесыже-влак почеш спектакльлам шынденыт. Моркышто ила.

Мом возен[тӧрлаташ]

  • «Чоткар»— роман. Коло ик йыжыҥ.
  • «Мамич Бердей» — роман. Коло ик йыжыҥ.
  • «Онар» — кум ужашан роман.

«Онар», «Чоткар» да «Мамич Бердей» романже-влак марий калык акрет годсо неле илышым ончыктышо, тудо жапысе событийым, эртымгорным чыным рашемдаш полшышо сылнымутан произведенийлан шотлалтыт. Ожнысо илышын тӱрлӧ йыжаҥан улмыжым почын пуымо дене пырля автор кугезе тукымын психологийжым, тӱняужмыжым, йот тушман ваштареш пеҥгыдын шогымыжым, уш-акыл ден чоялыкшыммоштен кучылтмыжым яндар поян йылмедене сӱретла.

Премий-влак[тӧрлаташ]

«Чоткар» ден «Мамич Бердей» романым возымыжлан 2003 ийыште Л. Яндак Марий Эл Республикысе Чавайн лӱмеш кугыжаныш премийже дене палемдалтын.

2008 ийыште «Онар» роман-трилогийже Эстонийысе родо-тукым калык-влак программын Литератур премийже дене палемдалтын.

Негыз[тӧрлаташ]