Изибаев-Бирь, Алексей Русаевич

Википедий — эрыкан энциклопедий гыч материал
Алексей Русаевич Изибаев-Бирь
Алексей Изибаев-Бирь
Шочмаш дене лӱм Алексей Русаевич Изибаев-Бирь
Шочын 1952 ий 26 шыжа(1952-10-26) (71 ий)
Шочмо вер Башкир АССР, Мишкан кундем, Кемей ял
Чап пӧлек да премий

Алексей Изибаев-Бирь (1952 шыжа 26, Башкир АССР, Мишкан кундем, Кемей ял) — марий мурызо, Марий Эл Республикысе Олык Ипай лӱмеш Кугыжаныш самырыктукым премийын лауреатше (1998), Марий Эл Республикын сулло артистше (1998). Йӱкшӧ ныл октавыш шуэш.

Илыш корныжо[тӧрлаташ | кодым тӧрлаташ]

Алексей Изибаев-Бирь 1952 ий шыжа тылзын 26-ше кечынже Башкир АССР Мишкан кундем Кемей ялыште шочын.
Тусо кыдалаш школым тунем пытарымеке, 1972-1974 ийлаште армийыште служитла. Салтак лийме жапыште вокально-инструментальный ансамбльыште шоктен.

Икана мурызын черланымыжлан кӧра тудым солист семын мураш йодыныт. Мурен да чыла шот дене лектын, мурымыжлан моктен ойлымым колын. Тиддеч вара эртак мурымо паша нерген шонаш тӱҥалеш. Армий гыч мӧҥгыш толмеке, тунамак Ӱпӧ оласе сымыктыш училищын вокальный пӧлкашке тунемаш пура. Тунемын лекмекыже, Пошкырт республикыште кандаш ий ансамбль пелен солист семын мурен коштеш.

1987 ийыште Марий АССРышке толеш. Тунам марий эстраде йол ӱмбаке шогалаш гына тӱҥалын. Ондак В.Куприяновын, А.Яшмолкинын, варарак С.Маковын, В.Захаровын да В.Кульшетовын мурыштым радио дене йоҥгалтарен. Варажым Изибаев марий муро-влак дене репертуарым ыштен шуктенат, телевидений денат, посна концертлаштат чӱчкыдын выступатлаш тӱҥалеш. Тудым тӱрлӧ фестиваль ден конкурслашке ӱжыт. Мутлан, 1988 ийыште Озаҥыште Юл да Урал кундемысе композитор-влакын фестивальыштышт участвоватла. Марий республикын артистше семын Москосо сценышкат лектеш. 1990 ийыште Всесоюзный телевидений дене Алексей Изибаев-Бирьын пел шагаташ концертшым ончыктеныт.

Тиде ийыштак «Кас» эстрадный группым пога. Гастроль дене Татарстан ден Башкортостан, Казахстан республикла, Свердловск да Тюмень областьла гоч эртеныт.

Марий тӱвыраште тыршымыжым кӱкшын аклен, Алексей Русаевич Изибаев-Бирьлан 1990 ийыште Марий Эл Республикысе Олык Ипай лӱмеш Кугыжаныш самырыктукым премийын лауреатше лийын, 1998 ийыште Марий Эл Республикын сулло артистше сулен налын.

Чап[тӧрлаташ | кодым тӧрлаташ]

Кылвер-влак[тӧрлаташ | кодым тӧрлаташ]